Një takim mes Erdogan dhe Scholz shpalosi diferencën e thellë mes tyre në qëndrimet ndaj asaj ç’po ndodh në Lindjen e Mesme.
Kancelari gjerman pranoi se Berlini dhe Ankaraja kanë pikëpamje të ndryshme mbi operacionet ushtarake të Izraelit, por theksoi se ata ndajnë shqetësime të ngjashme për vuajtjet e civilëve dhe nevojën për një armëpushim. Ai theksoi se sulmet e 7 tetorit nga Hamasi ishin një krim i urryer dhe tha se Izraeli ka të drejtën e vetëmbrojtjes dhe duhet t’i përmbahet ligjit ndërkombëtar, i cili ka qenë politika e jashtme e Gjermanisë për shumë vite. “Ne gjithmonë po bëjmë përpjekje për të ofruar ndihmë humanitare për Gazën, por kjo nuk mjafton”, tha ai, duke shtuar se tani duhet të punojmë për një zgjidhje me dy shtete, një armëpushim dhe lirimin e pengjeve. “Duhet të ketë një zgjidhje me dy shtete. Ne po bëjmë përpjekje në këtë drejtim, si për palestinezët, ashtu edhe për ekzistencën e Izraelit”, theksoi Scholz.
Ai pranoi se qeveria e tij mban një përgjegjësi të veçantë për sigurinë e Izraelit për shkak të së kaluarës naziste të vendit dhe krimeve të kryera kundër hebrenjve gjatë Luftës së Dytë Botërore.
Nga ana tjetër, Erdogan tha se duhet t’i themi “stop” Izraelit, “nëse nuk e ndalojmë, rajoni nuk do të gjejë paqe”. “Më shumë se 50 mijë njerëz janë vrarë deri më tani”, tha ai. “Ku po shkojmë?”.
Në të njëjtën kohë, Erdogan u kthye kundër Perëndimit për qëndrimin e tij ndaj Lindjes së Mesme: “Ata gëzohen (në Izrael) për martirizimin e shumë udhëheqësve. Perëndimi po argëtohet me të. Qasja e Amerikës nuk është e ndryshme në të gjithë këtë proces. Nuk është e vështirë për Izraelin të sigurojë armë, municione, mjete dhe pajisje. Ata vazhdojnë t’u japin atyre këtë dhe Izraeli vazhdon masakrën e tij.” /tesheshi.com/
