Ministri i Punëve të Jashtme, Ditmir Bushati deklaroi sot se ngjarjet në Kumanovë cënojnë integrimin e rajonit në BE.
Gjatë fjalës së tij në çeljen e Ministerialit të SEECP, kryediplomati shqiptar, Bushati tha se ngjarjet e fundit në rajon rrezikojnë proçesin e integrimit. “Duhet të lëmë mënjanë mosmarrëveshjet e të shkuarës. Duhet të punojmë për të krijuar një të ardhme të përbashkët për integrimin e rajonit. Bashkimi Europianë është synimi ynë i përbashkët dhe ndasitë e të shkuarës janë pengesa kryesore në këtë drejtim”, tha ai.
Duke folur për ngjarjet në Kumanovë, ministri Bushati i cilësoi si të rrezikshme në rrugën drejt integrimit, teksa kërkoi zbardhje të plotë të ngjarjes. “Të bëjmë më shumë që çështjet në Maqedoni të zbardhen, të zgjidhim mosmarrëveshjet, siguria e çdo vendi të jetë e pandashme nga siguria jonë. Ne kemi kërkuar që ngjarjet të hetohen plotësisht, në mënyrë të besueshme dhe transparente. Pikërisht në këtë sfond, vendet e Ballkanit Perëndimor duhet të intensifikojnë përpjekjet e përbashkëta brenda kuadrit të procesit të Berlinit”, tha ai.
Sipas Bushatit, Shqipëria do të vazhdojë të promovojë paqen dhe stabilitetin në rajon. Ai përmendi dhe një sërë arritjesh të Shqipërisë në rrugën e integrimit, ku theksoi se është e rëndësishme që reformat të jenë të kuptueshme nga qytetarët.
Në takimin e Procesit të bashkëpunimit të vendeve të Europës Juglindore u diskutua për zhvillimet aktuale dhe për promovimin e bashkëpunimit për një fqinjësi të mirë. Pas Samitit dyditor, Tirana do t’i dorëzojë kryesimin Bullgarisë.
