Vetëm dy ditë pas deklaratës së ambasadorit amerikan në Tiranë, Donald Lu, që ishte një adresim direkt për ministrin e Brendshëm, Saimir Tahiri, seanca e sotme e Kuvendit ishte pritshëm pasqyrimi politik i saj.
Por ndërsa mazhoranca kishte “bojkotuar” Kuvendin (Rama ndodhet në vizitë zyrtare në Turqi kurse Meta i la drejtimin Leskajt), Saimir Tahirit i ndodhi një ‘incident” në sallën e Kuvendin që është adresuar menjëherë nga kundërshtarët.
Ministrit të Brendshëm iu thye karrikja edhe fizikisht në transmetim live, pikërisht në ditën kur kundërshtarët kërkojnë largimin e tij.
Dhe si për rastësi, menjëherë pas këtij incidenti e mori fjalën deputeti që flitet se do të emërohet në postin që mban Tahiri: ish-Kryeministri Pandeli Majko.
Për t’i “futur xixat” situatës, ish-Kryeministri tjetër, Sali Berisha, ka përmendur emrin kryesor që doli nga goja e ambasadorit Donald Lu.
“Emiljano Shullazi ka marrë peng kryetarin e bashkisë së Durrësit Vangjush Dakon”. Ndërkohë disa media bënë të ditur se Prokuroria ka mbyllur dosjen e Shullazit, i cili është një nga të akuzuarit më të mëdhej për lidhjet e krimin me politikën.
Vetë Sajmir Tahiri, ka mbajtur fjalën në Kuvend, duke rritur dozën e nervozitetit në drejtim të Berishës, duke përsëritur akuzat për fëmijët e tij.
Ndërkohë, burime diplomatike i thanë tesheshi.com se kabineti Rama do të pësojë një ndryshim thelbësor pas miratimit të buxhetit, ku nuk mungojnë edhe emrat e disa ministrave socialist të kohës së Ilir Metës, që sot janë thjeshtë deputetë…
/tesheshi.com/
