Nga Mensur Krasniqi
Gazetari Vasko Eftov, i cili nuk zuri dot vend në televizionin shqiptar Alsat-m, pasi që u largua si pasojë e tendencave të veta për nënçmimin e pozitës së shqiptarëve në Maqedoni, tani emisionin “Në qendër”, po e realizon në tvKanal5. Këtu, i papenguar nga askush, në emisionin e fundit, Eftov ka rpvokuar një debat të madh duke deklaruar se 150 mijë shqiptarë nga Kosova e Presheva kanë marë nënshtetësi të Maqedonisë.
Por kjo informatw e gazetarit Vasko Eftov, kategorikisht hidhet si e pavërtetë nga ish-ministri për Punë Sociale, Naser Ziberi. Sipas tij, asnjëherë nuk ju është dhënë 150 mijë nënshtetësi kosovarëve.
‘’Jo, 150 mijë nënshtetësi të dhëna në kup ashtu siç pretendohet si e vërtetë, me përgjegjësinë më të madhe e them se nuk është e vërtetë. Nuk janë dhënë ashtu nënshtetësi siç thoni ju. Por me miratimin e ligjit për nënshtetësi në vitin 1993, një numër i madh i shqiptarëve mbetën pa nënshtetësi për shkak të dispozitave rigoroze të ligjit. Dhe sot e kësaj dite ka qytetarë të Maqedonisë që prejardhjen e kanë nga Serbia, Mali i Zi e më shumë nga Kosova të cilët akoma nuk e kanë fituar statusin e nënshtetësisë të Maqedonisë’’, ka deklaruar Naser Ziberi në intervistën për emisionin ‘’Në qendër’’.
Ndërkohë, si shqetësim i dytë serioz është përmendur edhe informata se mbi 200 mijë votues janë fiktiv. Këta votues fiktiv dyshohet se keqpërdoren nga partia e Gruevskit. Për këtë temë, ish-kryetari i KSHZ-së, Aleksandar Novakovski ka theksuar se këto pohime nuk janë të vërteta. Por sipas tij, gjatë kohës kur ai ka qenë kryetarëjanë zbuluar 20 mijë persona të cilët nuk kanë pasur të drejtën e votës.
‘’Ne zbuluam se ka mbi 20 mijë njerëz që nuk duhet të jenë në listën zgjedhore. Ky numër nuk është i vogël, për shkak se një parti mund të merr edhe 3 deputet’’, ka deklaruar Novakovski duke sqaruar se zgjedhjet në Maqedoni mund të mbahen edhe pa regjistrim të popullatës.
‘’Janë të mundëshme dhe çdoherë e kam thënë se të gjithë ekspertët janë të vetëdijëshëm për këtë çështje se zgjedhjet mund të mbahen edhe pa regjistrim të popullatës por kjo përdoret për qëllime politike’’, ka thënë Novakovski.
Ndryshe, ideja e gazetarit Vasko Eftov është që në mënyrë të rrejshme të alarmojë opinionin në Maqedoni se kinse vendi ynë është mbushur me shqiptarë nga shtete tjera të cilët kanë ardhur këtu të jetojnë përkohësisht, dhe se më pas, me ndihmën e politikës kanë marrë nënshtetësi të Maqedonisë dhe me këtë kanë të drejtë vote. Në këtë formë Eftov duket se ka një qëllim tendencioz që të japë një pasqyrë të rrejshme për shqiptarët e Maqedonisë, duke i llogaritur ata si ardhacak. /tesheshi.com/
