Elon Musk njoftoi këtë të shtunë, më 5 korrik, se kishte themeluar një parti të re politike – Partinë Amerikane – pasi i pyeti ndjekësit e tij në një sondazh online nëse duhej ta bënte këtë.
Vendimi pasoi përplasjen e tij publike me Presidentin republikan Donald Trump.
Të premten, Musk i pyeti ndjekësit e tij në platformën X nëse duhet të themelohet një parti e re politike në Shtetet e Bashkuara.
Të shtunën në mbrëmje, ai shkroi në të njëjtën platformë: “Me një diferencë 2 me 1, ju doni një parti të re politike – dhe do ta merrni atë!
“Kur bëhet fjalë për shkatërrimin e vendit tonë me shpërdorim dhe korrupsion, ne jetojmë në një sistem njëpartiak, jo në një demokraci. Sot, Partia Amerikane po formohet për t’ju dhënë përsëri lirinë tuaj”, tha Musk.
Tashmë pritet të shihet nëse ky manjat i teknologjisë, njëherësh ndër më të pasurit në botë, do ketë apo jo sukses politik.
Pritet të shihet gjithashtu se si do reagojë Trump ndaj kësaj lëvizjeje të ish-partnerit të deridjeshëm dhe kundërshtarit të sotëm. /tesheshi.com/
