Në kulmin e sezonit, nën trishtimin e një zbehjeje të dukshme të pranisë turistike, Vlora, pika e dobët e kryeministrit Rama, po përjeton, si për cinizëm, orët e tmerrshme të një reje tymi ndotës që po del nga vendgrumbullimi i mbetjeve, si pasojë e një zjarri aty.
Kryebashkiakut Dredha nuk i mbetet të thotë vetëm se duhet kërkuar autori, pasi strukturat nuk po munden ta eliminojnë këtë zezonë të rëndë mjedisore në sezon.
“Zjarri është vendosur nga dora e njeriut, e qëllimshme apo jo nuk mund ta themi. Por është dore njeriu pas zjarrit. Nuk mund të digjet kurresi fusha e mbetjeve vetë, pasi më parë kemi patur temperatura edhe më të larta – 40 gradë dhe nuk kemi pasur problem. I bëj thirrje Policisë, Prokurorisë që të na ndihmojë të identifikojmë autorin se pak rëndësi ka me qëllim apo jo, por duhet të japim shembull për komunitetin se në fund të ditës e pëson i gjithë qyteti”, tha Dredha.
Por ç’bëhet me plehrat e një qyteti të madh me profil turistik, gjithnjë në vëmendjen e deputetit “shembullor” të saj, vetë kryeministrit?
“Kjo është një fushë e grumbullimit të mbetjeve që ka 40 vjet që përdoret. Praktikisht është jashtë kapaciteteve. Të gjithë jemi koshientë. Që nga dita e parë që kam ardhur në Bashki jemi duke u marrë përditë me handikapin ligjor. Para pak ditësh ka kaluar një vendim në Këshillin e Ministrave që i hap rrugë Bashkisë t’i kalojë menaxhimi i asaj fushe për të përfunduar punimet e pambaruara më parë. Jemi optimistë që fusha e Sherishtës të vendoset në funksion. Në këtë moment nis projekti i kapsulimit. Shumë shpejt do të kemi një marrëveshje direkt me Ministrinë e Turizmit që gjithë punimet dhe menaxhimi i landfillit në Sherishtë të bëhet nga Bashkia Vlorë”, shpjegon Dredha.
Megjithatë, ajo që mbetet është imazhi i një bombe mjedisore, bash në kohën më të paduhur. /tesheshi.com/
