Rreshqitja e dherave në zonën e Sharrës në Kombinat ka rrezikuar banesat e dhjetra banorëve. Duy ditë pasi situata u lajmërua në media, ministri i Brendshëm, Saimir Tahiri ka inspektuar zonën nga afër. Gjatë një takimi me banorët e prekur, ai e konsideroi situatën emergjente dhe garantoi masa për ndërhyrje të menjëhershme.
“Kjo është një situatë emergjente. Dhe si e tillë, nënkupton marrjen e masave për të shmangur rrezikun e menjëhershëm. Më pas, paralelisht me këtë vjen faza e rehabilitimit, në mënyrë që rreziku i menjëhershëm të shmanget nga shtëpitë e banorëve dhe më pas duhet parë konkretisht çfarë lloj investimi duhet, për të mos lejuar përsëritjen në të ardhmen. Këtë mund ta thonë ekspertët”, u shpreh Tahiri për mediat.
Më herët, me gjendjen e banorëve u sensisbilizua edhe deputeti i opozitës, Edi Paloka. “Jam këtu me kërkesë të banorëve, sepse ka dy ditë që ka rrëshkitur dheu në këtë zonë. Siç e shihni edhe vetë, situata është vërtetë e rëndë. Siç duket banorët pas kërkesave të vazhdueshme që kanë bërë për t’u ardhur në ndihmë, janë ndjerë pa mbështetje dhe pa mbrojtje duke na njoftuar ne. Më vjen mirë që kanë ardhur emergjencat civile dhe uroj t’i japin zgjidhje sa më shpejt këtij problemi”, tha Paloka.
Ai theksoi se autoritetet u kujtuan të marrin masa me vonesë, pas presionit e denoncimit mediatik./tesheshi.com
