Qeveria kiliane njoftoi të hënën se shirat e rrëmbyer që sollën përmbytje në një rajon përgjithësisht të thatë në veri të vendit u morën jetën 17 njerëzve, ndërsa 20 të tjerë janë ende të humbur.
Shirat gjatë gjithë javës së shkuar nxorën lumenjtë nga shtrati, duke sjellë përmbytje, bllokime rrugësh e ndërprerje të energjisë elektrike.
Rreshjet në qytetin verior të Antofagastës janë të pazakonta për shkretëtirën e Atakamës, e cila është një prej më të thatave në botë.
Zëvendësministri i Punëve të Brendshme, Mahmud Aleuy, e ka quajtur përmbytjen si katastrofën më të madhe në veri në 80 vite nga shiu.
Banorët në rajonet shkretinore po punojnë për hapjen e rrugëve, e për pastrimin e shtëpive nga balta. Ushtria po ndihmon me forcat e saj, ndërsa qeveria deklaroi se ka dërguar 700 ton ndihma. /tesheshi.com/
