Nga Bekim Laci, Kumanovë
Tërheqja e forcave policore ka bërë të mundur kthimin e popullatës së “Lagjes së trimave” nëpër shtëpitë e tyre, ndërsa pamjet e para janë tmerruese.
Gjaku dhe gëzhojat e plumbave të shkrepur janë treguesit e ndodhive në këtë pjesë të Kumanovës të cilat dëshmojnë për luftimet e ashpra, ndërkohë rreth 40 shtëpi llogariten të shkatëruara në masë që i bën ato të pabanuara.
Edhe automjetet që kanë qenë të parkuara në oborret e shtëpive janë djegur ose dëmtuar nga të shtënat.
Përveç kësaj, rrjeti i rrymës elektrike është shkatërruar, për cka do të duhet kohë që banorët të kthehen në shtëpitë e tyre.
Azem Ibrahimi tregon se në kohën kur kanë shpërthyer luftimet ka qenë në xhami për namazin e sabahut, dhe kur ka dëgjuar krismat ka shkuar me vrap në shtëpi ku ka marë gruan bashkë me dy fëmijët. “Dymbëdhjetë orë kemi qëndruar në bodrumin e shëtisë së vëllaut”, thotë ai e rrëfen më tej: “Shtëpinë e këmi ndërtuar që të kënaqemi në të. Djali im ka punuar 20 vjet në Zvicër dhe ka investuar në ndërtimin e shtëpisë”, shprehet Ibrahimi, që e sheh tashmë pasurinë e vet komplet të rrënuar
Agron Ajdini, është një tjetër qytetar që ka pësuar dëme të konsiderueshme materiale. Ai thotë se është evakuuar në kohë, por thotë se gjatë daljes nga lagja, policia e ka ndaluar vëllanë e tij, i cili mbahet në polici, ndërsa thotë se do të kërkojë dëmshpërblim nga shteti.
Kryeministri Gruevski ka premtuar se shteti do dëmshpërblejë qytetarët e dëmtuar, por gjithsesi ekziston dyshimi se kjo nuk do të ndodhë, të paktën ashtu siç duhet të jetë dëmshpërblimi, i plotë dhe i shpejtë.
Tashmë, ankthi i luftimeve në Komanovë, është zëvëndësuar me atë të përballjes me pasojat. Orë pas orë, dalin në dritë pasojat e luftimeve.
Sakaq, mbetet ende mister se ç`ishte ajo betejë. Autoritetet kanë publikuar fotot e disa të ndaluarve, por pakkush beson se ata kanë qenë vërtet një grup i amratosur dhe i angazhuar në luftime për ndonjë kauzë kombëtare.
Pothuajse tek të gjithë dominon ideja se gjithë çfarë ndodhi në Kumanovë ishte një “lojë luftash” për hir të mbajtjes së pushtetit nga ana e Gruevskit, një lojë me kosto të lartë njerëzore. /tesheshi.com/
