Presidenti i SHBA-së, Donald Trump, ka përshëndetur “progresin e madh” të bërë gjatë bisedimeve tregtare midis udhëheqësve amerikanë dhe kinezë në Gjenevë mbi tarifat dhe tha se është negociuar një “kthim në status quo-në origjinale”.
“Sot patëm një takim shumë të mirë me Kinën në Zvicër. U diskutua shumë, u ra dakord për shumë gjëra”, shkroi Trump në Truth Social.
“Negociatat për ‘rivendosjen’ e plotë u arritën në një mënyrë miqësore dhe konstruktive. Shpresojmë, për të mirën si të Kinës ashtu edhe të Shteteve të Bashkuara, që Kina do t’u hapet kompanive amerikane. Është bërë përparim i madh!”, shkroi ai.
Bisedimet midis Kinës dhe Shteteve të Bashkuara, të cilat filluan të shtunën në mëngjes në një vilë luksoze në Gjenevë në përpjekje për të zgjidhur luftën tregtare midis dy vendeve, u ndërprenë në mbrëmje dhe janë planifikuar të rifillojnë të dielën në mëngjes.
Javë tensioni
Të dy kryeqytetet dërguan përfaqësues të lartë në Gjenevë këtë fundjavë për negociata: Sekretarin e Thesarit të SHBA-së, Scott Bessent, Përfaqësuesin e Tregtisë të SHBA-së, Jamieson Greer dhe Zv/kryeministrin kinez, He Lifeng.
Bessent dhe Greer u takuan me përfaqësues kinezë pas javësh tensionesh në rritje për shkak të tarifave mbi 100 për qind të vendosura nga Presidenti i SHBA-së, Donald Trump, mbi mallrat kineze.
Mosmarrëveshja tregtare, së bashku me vendimin e Trump-it muajin e kaluar për të vendosur tarifa ndaj dhjetëra vendeve të tjera, ka ndërprerë zinxhirët e furnizimit, ka tronditur tregjet financiare dhe ka rritur frikën e një ngadalësimi të ndjeshëm ekonomik. /tesheshi.com/
