Roma ka arritur të fitojë ndaj Xhenovës në transfertë, në një ndeshje ku lojtarëve romanistë u është dashur të përmbysin rezultatin. Fitorja 2-3 është frymëzuar pa dyshim nga 39-vjeçari Francesco Totti, që ka shënuar sërish një gol të shkëlqyer.
Rilindja e papritur e Totti-t në këto javë të kampionatit italian ka bërë që ai të shënojë katër gola në tre prej katër ndeshjeve të fundit.
I mrekullueshëm ishte goli i mbrëmshëm ndaj Xhenovës, me një goditje të fortë nga jashtë zonës, tipike për Totti-n. Xhenova kryesonte 2-1 gjer në atë moment, në minutën e 77-të, kur Totti barazoi shifrat. Goli i fitores do të shënohej për Romën tre minuta para fundit të lojës nga Shaarawy.
Trajneri i Romës, Luciano Spalletti, tejet i kënaqur me paraqitjen e kapitenit, nuk i ka kursyer fjalët e mira për të, edhe pse javë më parë u fol për një përplasje fizike mes tyre.
“Sipas meje, Totti është një diamant. Ai është më shumë se 24 karatë.”
Totti mund të luajë edhe një sezon tjetër me Romën, siç është edhe dëshira e tij. Por ende nuk ka një vendim të presidencës së klubit. Spalletti ka treguar se është në krah të lojtarit.
“Francesco ka bërë gjëra të jashtëzakonshme këtu. Nëse ai e zgjat karrierën, unë jam shumë i lumtur.”
Kur duhen edhe dy javë për t’u mbyllur kampionati italian, Roma gjendet në vend të tretë në klasifikim, dy pikë larg Napolit të vendit të dytë. /tesheshi.com/
