Papa Françesku, i cili është shtruar në spital javët e fundit për shkak të një gjendjeje të rëndë shëndetësore, ka habitur besimtarët duke u shfaqur në tarracën e spitalit ku po shërohej.
Paraqitja dhe prania e tij në tarracë shkaktoi emocione të pamasë tek qindra besimtarët e mbledhur që erdhën për ta përshëndetur.
Lajmi se Papa mund të largohej nga spitali u prit me shumë entuziazëm dhe optimizëm, pasi së fundmi ai ishte në një gjendje shumë kritike shëndetësore, pothuajse në prag të vdekjes. Kjo kthesë e papritur pozitive e ngjarjeve shkaktoi “tronditje” dhe gëzim të vërtetë tek besimtarët, të cilët u mblodhën për të ndarë momentin e shërimit të tij.
Një zyrtar i lartë i Vatikanit i afërt me Papën tha për Sky News se rikuperimi i Papa Françeskut ishte “mjaft i jashtëzakonshëm”, duke shtuar se sfida tani ishte që Papa të kuptonte se si kishte ndryshuar jeta e tij dhe se do t’i duhej të përshtatej me një epokë të re.
“Sfida tani është ta bëjmë atë të kuptojë se jeta e tij ka ndryshuar dhe ai duhet të përshtatet me një epokë të re”, tha burimi, i cili nuk deshi të përmendet emri.
Pelegrinë dhe besimtarë të shumtë u mblodhën që në orët e para të mëngjesit për të festuar kthimin e tij, ndërsa në sheshin e Shën Pjetrit dhe përballë Spitalit Gemeli u dëshmuan një gëzim dhe festë të madhe.
Gjatë trajtimit, Papa mori terapi të kombinuar, duke përfshirë doza të larta oksigjeni dhe ventilim joinvaziv. Fatmirësisht ai nuk ishte i intubuar dhe ishte i ndërgjegjshëm, i orientuar dhe bashkëpunues me personelin mjekësor gjatë gjithë kohës.
Në dy javët e fundit gjendja e tij është stabilizuar dhe po shënohet progres gradual. Mjekët theksuan se shkarkimi i Papës nga spitali është një “shkarkim i mbrojtur”, që do të thotë se ai do të vazhdojë të marrë terapi, të përdorë mbështetje oksigjeni nëse është e nevojshme dhe të pushojë për të paktën dy muaj. /tesheshi.com/
