Nga Mensur Krasniqi
Përkundër pamjeve trishtuese që vijnë nga Gjevgjelia, atje ku po shkruhet këto kohë drama reale e qindra refugjatëve të ardhur nga Siria, Maqedonia, shoqëria e saj, sidomos faktori shqiptar, po ofrojnë dhe skena plot humanitet, shpresë e optimizëm njerëzor, duke ndihmuar me sa munden për t`ua lehtësuar hallin e madh të ardhurve nga larg.
Janë shumë i shoqata të cilat po kanë një angazhim maksimal këto javë në ndihmë të tyre, me strehë, ushqim e vëshëmbathje. Me aktivistët e tyre të stacionuar kudo përgjatë rrugëtimit që bëjnë refugjatët, ato u gjenden si një dorë bujare në hallin e madh që u ka zënë. Dhe duhet pohuar fakti se ndër aktivistë humanë, ka dhe shumë të rinj e të reja maqedonas, që bashkë me shqiptarët, po shkruajnë dhe ata një histori humaniteti, gjë që po ndodh sidomos në Kumanovë, ku janë të angazhuar në kuadër të shoqatës “Vllaznia”.
Por po veçojmë dy shoqata humanitare, “Legis” dhe “Merhamet”, ku drejtues të tyre kanë preferuar të thonë diçka për portalin tonë.
Jasmin Rexhepi, kryetar i shoqatës humanitare “Legis” , shpjegon skemën e punës për t`ju ardhur në ndihmë refugjatëve sirianë:
“Puna jonë është kjo në vijim: Në dy kufijtë shpërndajmë nga 3000 pako me ushqim dhe ujë, pako higjenike për fëmijë dhe gra, veshje dhe këshilla. Kemi 3 magazina në Shkup, Kumanovë dhe Gjevgjeli dhe mbi 30 aktivistë. Kemi edhe leje nga agjencioni për ushqim që të krijojmë pakot tona”, Jasmin Rexhepi.
Ata gjithashtu kanë qenë dëshmitarë të incizimeve të mediumeve të ndryshme që e shfaqin brutalitetin e policisë ndaj refugjatëve të frikësuar.
“Ato janë raste të rralla dhe jo të përditshme, dhe janë si rezultat i mosnjohjes së gjuhëve të huaja nga ana e policisë. Gjithsesi, s`i gjykojmë këta raste dhe shpresojmë që institucionet do të ndërmarin masa konkrete ndaj të punësuarve të tyre që nuk mund ta kontrollojnë mllefin, ose janë të urdhëruar vetë nga shteti”, shtoi Rexhepi.
Dorën e humanitetit ndaj emigrantëve e ka zgjatur edhe Shoqata humanitare “Merhamet”. Kjo shoqatë kishte filluar aktivitetin e saj që prej ardhjes së refugjatëve të parë në qytetin e Kumanovës. Strehimet e para emigrantët, sipas përgjegjësit për shpërndarjen e ndihmave, Eljesa Ismailit, i kishin pasur në xhaminë e Sinan Tatar Pashës.
“Zyrtarisht, para 3 muajve, prej shoqatave të para është Merhameti që u aktivizua për ndihmë të emigrantëve gjegjësisht për artikuj ushqimor (kroasan, pashtet e artikuj të tjerë, – me qëllim që të mbajë ushqimi sa ma gjatë), veshmbathje, qebe të ndryshme që të kenë pushim sa më të komodshëm , organizimin e mjekëve për ndihmën e shpejtë etj”, tha për tesheshi.com, Eljesa Ismaili.
Në mënyrë që mos të ndalin aktivitetin e tyre, aktivistët e kësaj shoqate kanë organizuar një iftar madhështor në ditën e parë të Ramazanit, ku si mysafir kishin 300 refugjatë.
Përveç produkteve ushqimore, “Shoqata humanitare Merhamet” refugjatëve i’u kanë ofruar edhe ndihmë mjekësore dhe mjete qarkullimi.
“Kemi qenë afër tyre duke i ndihmuar edhe me madikamente e shërbim mjekësore për çdo rast, nëse ndonjë emigrant ka hasur probleme shëndetësore, ku dhe kemi thirrur ndihmën e shpejtë dhe kështu i kemi transferurar në spital. Pas interevenimit mjekësor, që emigrantin mos ta lëmë të vetëm (pasi që ishin orë të vona ata nuk dinin të orientoheshin dhe nuk kanë asnjë tjetër për ndihmë ), ne patjetër u detyroheshim që t`i strehojmë në hotel për të fjetur. Të nesërmen, tërë ditën ishim afër tyre ndërsa në mbrëmje me taksi apo mjete transporti tjera ne ata i kemi përcjellë deri në kufi”, shtoi Ismaili.
Si çdo shoqatë, edhe shoqata Merhamet ka hasur në pengesa të shumta gjatë ushtrimit të veprimtarisë së saj në ndihmë ndaj refugjatëve.
“Pengesat ma të mëdha që hasëm ishin nga sektori i mbrojtes konkretisht nga ana e disa policëve që çdo mbrëmje ndaj nesh bënin kontrolle të ndryshme, si kërkim letëridentifikimi, emër e mbiemër, targat e kerit etj., edhe pse e dijnë që ne jemi krejt në rregull me ligin. Pengesa e dytë ishte nisja dhe arritja e trenit. Moskordinimi i palëve që ishin përgjegjës për udhëheqjen e tyre, çonte deri në atë pikë sa arritja e trenit në hekurudhën në Tabanovcë të vinte me vonesë dhe në orë të vona. Pengesa e tretë ishte lejeqëndrimi i refugjatëve. Edhe pse refugjatët kishin lejeqëndrim strehimor për 72 orë, disa policë nuk e kuptonin këtë dhe kanë tentuar që me dhunë t`i largojnë sa më shpejtë nga kampet strehimore”, përfundoi Ismaili. /tesheshi.com/
