Për kryesuesit e kampionateve më të mira të Europës ka patur një fundjavë pozitive, teksa ato kanë fituar e ndjekësit e tyre kanë lëshuar terren përmes humbjesh a barazimesh.
Pasi kishte parë më herët hapat e gabuar të rivalëve, Reali i Madridit qe tejet i vendosur të fitonte mbrëmë ndaj Real Sociedadit në “Santiago Bernabeu”. Reali bëri më tej në kryesimin e La Ligës me mposhtjen 3-0 të mysafirëve. Veç katër pikëve më shumë se Barcelona e vendit të dytë, madrilenët kanë dhe një ndeshje më pak të luajtur.
Që rivalët për titull nuk ishin në formë u duk që të shtunën, kur Atletiko e Madridit barazoi pa gola ndaj Alavesit. Po me barazim, por 1-1, u ndanë dhe Real Betis me Barcelonën. Vërtet mund të ketë polemika dhe pakënaqësi për një gol të padhënë për katalanasit, por nuk duhet harruar se vendasit e Betisit meritonin më shumë se barazimi. Akoma më keq Sevilja, që humbet 3-1 në fushën e Espanjolit dhe dorëzon vendin e dytë.
Ekspert i Serisë A, Juventusi u buzëqeshi me ironi kundërshtarëve nga larg kur fitoi ditën e djeshme 0-2 ndaj Sasuolos në transfertë. Katër pikët e diferencës me Romën e vendit të dytë mund të shkojnë në shtatë pasi torinezët të luajnë një takim të tyre të prapambetur.
Një diferencë sigurie në pikë e Juventusit falë dhe rezultateve jo të mira të skuadrave të tjera pretenduese. Roma rrëzohet në fushën e Sampdorias e humbet 3-2, ndërsa Napoli mezi barazon para tifozëve të tij ndaj Palermos; një barazim 1-1 që erdhi madje nga një gabim trashanik i portierit mik.
E kundërt fundjava për skuadrat e Milanos. Interi shemb 3-0 Peskarën, në të shtatën fitore radhazi në kampionat, e ngjitet në vend të katërt, Milani humbet 2-1 ndaj Udinezes e zbret në vend të shtatë.
Lajpcigu mbetet i vetmi ekip që reziston në ndjekjen e Bajernit të Mynihut në Bundesligën gjermane. Fitorja 1-2 e Bajernit në transfertën ndaj Verder Bremenit ka marrë si përgjigje një fitore 2-1 të Lajpcigut ndaj Hofenhajmit. Një rezultat që merr më shumë vlerë kur merret në konsideratë fakti se Hofenhajmi ishte skuadra e vetme pa humbje në të gjitha kampionatet elitare në Europë. Largësia në pikë mes Bajernit të Mynihut kryesues dhe Lajpcigut të vendit të dytë mbetet tre pikë; dy ekipet kanë përkatësisht 45 e 42 pikë.
Mirë bëri dhe Eintrahti i Frankfurtit, që ndaj Shalkes fitoi 0-1 dhe u ngjit në vend të tretë në klasifikim. Vetëm një barazim 1-1 për Borusian e Dortmundit në fushën e Mainzit.
Në ligën e parë franceze, PSG-ja dhe Monakoja ndanë nga një pikë në “Parc des Princes”. Cavani shndërroi në gol një 11-metërsh në minutën e 81-të; një epërsi e kthyer në barazpeshë në minutën e 92-të, kur realizoi Bernardo Silva me një gjuajtje të fortë.
Rezultati 1-1 qe në favor të Monakos, që e ruajti kryesimin e kampionatit francez edhe pse Nisa pati fituar më herët. Monako e Nisa posedojnë nga 49 pikë, tre më shumë se kryeqytetasit e PSG-së, të tretët në renditje. /tesheshi.com/
