Pamjet që shpërndajnë mediat e ndryshme botërore për Gazën janë të një shkatërrimi total ashtu si ato të Luftës së Dytë Botërore nga qytetet gjermane, që u shkatërruan nga bombardimet e aleatëve. Pamjet që vijnë nga Gaza të kujtojnë atë që ndodhi një ditë më pas në Nagasaki dhe Hiroshima. Vetë këto pamje
janë vrastare dhe nuk të lejnë vend për të tjera komente, por ndjesia që të shkaktojnë janë një dhimbje e pafund.
Një anëtar i Knesetit Izraelit iu drejtua kolegëve të vet me fjalët: “Mbrëmë vramë 150, dhe sonte vramë 100 palestinezë në Gaza, dhe askush në botë nuk interesohet.”
Heshtja politike ndërkombëtare më solli ndërmend fjalët e znj. Meloni në parlamentin italian, e cila ju përgjigj deputetëve italianë që kërkonin një aksion politik propalestinez: “E çfarë përfitoj unë nga kjo?”
Katastrofa humanitare e Gazas po ia tejkalon asaj të Holokaustit dhe kjo po pranohet gjerësisht edhe nga të mbijetuarit e Holokaustit dhe studiuesit e saj gjerësisht.
Kjo katastrofë është e disa përmasave: e para është në numrat njerëzore, ku humbjet e raportuara janë tragjike. Dhimbja më e madhe vjen nga numrat e fëmijëve të vdekur pa asnjë faj. Fëmijë të gjymtuar e të drobitur fizikisht shfaqen rëndom në video-reportet. Skelete fëmijësh që mezi ecin nga gjymtyrët e copëtuara nga bombardimet e ashpra. Fëmijë me tasa në duar që derdhin lotë për pak ushqim, apo për sadopak shërbim mjekësor.
Sy të trishtuar prindërish që lotojnë gjak për bebet e humbura nën shkatërrimin e ndërtesave të ndryshme, që veç shtëpi nuk mund të quhen më. Edhe spitale nuk gjen më, por mjekët heronj mundohen të shërbejnë nëpër çadra të sajuara me zorr.
Dr. Hussam Ebu Safijah dergjet i sëmurë e i torturuar burgjeve të tmerrshme izraelite. Cili ishte faji i tij? Iu shërbeu njerëzve të thjeshtë me përkushtim, me privacione nga më të ndryshmet, me mungesë ilaçesh e mjetesh mjekësore, pa u ankuar dhe sot ai po torturohet nëpër burgje.
Nakba palestineze është një tragjedi moderne që po luhet para syve tonë dhe ne nuk po bëjmë asgjë tjetër, veçse po shohim dhe konstatojmë.
Konstatojmë genocidin njerëzor, shkatërrimin masiv të godinave, genocidin fëminor, genocidin ndaj personelit mjekësor, ndaj pleqve e grave të pambrojtura, genocidin ndaj ullinjve vetëm pse janë të palestinezë!
A doni më?
