Dorëzimi i mandatit të Nikolla Gruevskit edhe pse duket se po përjetohet si një zhvillim traumatik në Maqedoni, ishte gjithsesi një zhvillim tejet i pritshëm.
Ishte portal rus Sputnik, qarqe të të cilit mbështesin fort kreun e VRMO-së, i cili parashikoi se do të dështonte tentativa e ish-kryeministrit për të formuar qeverinë e re.
Siç bënte të ditur Sputnik, të gjitha gjasat janë që Presidenti i vendit, Gjeorgje Ivanov të mandatojë për Kryeministër numrin 2 të VRMO-DPMNE-së dhe shefin e diplomacisë maqedonase në detyrë, Nikolla Poposki.
Dhe siç duket ndërkombëtarët kanë arritur një marrëveshje që në qeverinë e re të mos jetë asnjë eksponent politik që është i dyshuar nga Prokuroria Speciale.
Ndërkaq, BDI tashmë e ka marrë vendimin për të qeverisur me VRMO-në, duke marrë përsipër si kosto edhe çarjen e partisë së Ali Ahmetit.
Kjo pasi kreu i BDI-së ka frikë nga zgjedhjet e reja që do ta shkatërronin atë dhe parti e parë sipas të gjitha gjasave do të kalonte BESA.
Kreu i VRMO-DPMNE ka përdorur një taktikë presioni ndaj Ali Ahmetit, duke kërkuar paraprakisht zgjedhje të reja, në mënyrë që të frikësojë bazën e BDI-së për të pranuar më pas vendimin për koalicion me këtë parti, pa Gruevskin Kryeministër; kjo duke i nisur nga fakti se anëtarët e BDI-së janë të frikësuar nga zgjedhjet e reja. Sepse edhe ish-kryeministri Gruevski e di që në zgjedhjet e reja nuk do të ishte ai parti e parë, por Zaevi; ngaqë të gjithë e kanë parë që vota për VRMO-në nuk është e vlefshme derisa kjo parti nuk prodhon dot një qeveri efikase.
Ndaj dhe performanca e kreut të nacionalistëve maqedonase është një shantazh i qartë ndaj shqiptarëve të BDI-së, të cilët e kanë prishur Paktin e Tiranës dhe kanë ndërmarrë një rrugë të vetme.
Thuhet nën zë se Ali Ahmeti ka pasur përplasje të forta me Edi Ramën në telefon dhe ka marrë mbështetjen e Ilir Metës e Lulzim Bashës që të krijojë qeverinë.
Po ta lexosh deklaratën e partisë së Gruevskit, duket qartë se ata janë për skenarin nr.2, pra për një qeveri me një mandatar tjetër nga kjo parti.
“VMRO-DPMNE së bashku me koalicionin “Për Maqedoni më të mirë” si fitues në zgjedhjet e fundit, e cila morri përkrahje më të madhe të qytetarëve dhe fitoi numër më të madh të deputetëve, vlerëson se formimi i Qeverisë duhet të jetë në funksion të mbylljes së krizës politike, dhe jo thellimin e saj, dhe se mbajtja e zgjedhjeve të reja është një vendim i pjekur, ndërsa është në plan të parë në funksion të tejkalimit të krizës dhe vendosjen e reformave në prioritet të parë”, kanë thënë nga VMRO-DPMNE”., theksohet në deklaratë.
Por megjithatë, për t’u zbatuar skenari i një qeverie tjetër të VRMO-së ka një kleçkë. Mandatari që pritet të jetë Poposki, duhet t’i shkojë Presidentit me një listë me firmat e të paktën 61 deputetëve. A do ta bëjë këtë Ali Ahmeti që t’i japë garanci një mandatari tjetër të Gruevskit? Gjasat duhen për po. /tesheshi.com/
