Më tragjik është bilanci i një sulmi me armë mbi një xhami në Kebek të Kanadasë ndërsa besimtarët në të po falnin namazin e jatsisë. Siç e ka konfirmuar dhe policia vendase, bëhet fjalë për gjashtë të vdekur dhe tetë të plagosur.
“Gjashtë njerëz janë konfirmuar të vdekur; ata janë të moshës nga 35 në 70 vjeç,” do t’u deklaronte gazetarëve zëdhënësja e policisë rajonale, Christine Coulombe, që po ashtu do të raportonte për tetë të plagosur.
Dy janë të dyshuarit e ndaluar për ngjarjen, por policia nuk dha hollësi të mëtejshme, si për ta ashtu dhe për arsyen e sulmit mbi xhaminë.
Kryeministri kanadez e quajti vrasjen e besimtarëve muslimanë një akt terrorist.
“Ne e dënojmë këtë sulm terrorist mbi muslimanët në një qendër adhurimi dhe strehe,” u shpreh përmes një deklarate Justin Trudeau.
“Kanadezët muslimanë janë pjesë e rëndësishme e strukturës tonë kombëtare, dhe këto akte të pakuptimta nuk kanë vend në bashkësitë, qytetet e në vendin tonë.”
Akt terrorist e cilësoi sulmin dhe qeverisësi numër një i Kebekut, Philippe Couillard, që bëri thirrje për solidaritet me kebekasit e besimit musliman.
Persona të armatosur hapën zjarr rreth orës tetë të mbrëmjes së djeshme në Qendrën Kulturore Islame të Kebekut, pikërisht atëherë kur besimtarët po kryenin faljen e mbrëmjes. /tesheshi.com/
