Lista e klubeve që duan të kenë në përbërje Antuan Grizman është shumë e gjatë, por ditët e fundit, “dikush ka hyrë pa rradhë” e kërkon të përfitojë. Bëhet fjalë për, as më shumë e as më pak, por për Realin e Madridit.
“Los blancos” po mendojnë seriozisht të përforcojnë sulmin e tyre, pasi Ronaldo e Benzema, duhet të pushojnë më tepër për të qenë në formë. Në dukje marrëveshja duket e pamundur, pasi të dy klubet e Madridit, Reali dhe Atletiko, janë rivalë për fitimin e titullit në La Liga.
Por përtej asaj që shihet, “nën banak” mardhëniet nuk janë edhe aq të tensionuara, po të kemi parasysh se Reali bleu nga Atletiko këtë verë, mbrojtësin e majtë Teo Rodriguez.
Skuadra e Simeones vijon ta ketë në krye të sulmit mëngjarashin francez, por nuk do të ishte çudi që për shifrën e duhur, të privohej nga Grizman. Një vit më parë, francezi e kishte klauzolën e largimit nga Atletiko, 200 milion euro, por këtë sezon, shifra ka zbritur në 100 milion.
E duke qenë se 100 milionëshi është bërë shifër e zakonshme edhe për lojtarë ende të paprovuar me sfidat, për madrilenët do të ishte një “sforco logjike” të merrnin me këtë shifër, një prej sulmuesve më efikasë në kampionatin spanjoll.
Grizman po ndiqet edhe nga Barcelona që e kërkoi menjëherë pas shitjes së Nejmar, por edhe nga Mançester Junajted, që e dëshiron prej kohësh. /tesheshi.com/
