I ndodhur në SHBA për të marrë pjesë në një sesion të OKB-së, kryeministri Rama ka qenë i ftuar në një prej mediave të Trump-it, pikërisht Newsmax TV në New York, me në krah Grenellin jo fort të dashur për kosovarët.
Ai aty ka folur posaçërisht për Iranin, sulmet kibernetike të pretenduara nga regjimi shiit, duke çuar deri në ngrirje të marrëdhënieve diplomatike.
“Erdhi momenti që duhet të prisnim lidhjet me regjimin iranian, sepse ambasada e tyre në mes të kryeqytetit tonë nuk mund të vazhdonte të operonte si një qendër sulmesh”, tha Rama, duke vijuar t’i shpjegojë Grenellit qëndrimin e tij apo të qeverisë që përfaqëson: “Nuk e kam akuzuar unë Iranin, ne kemi prova dhe kjo ka dalë nga agjencitë e specializuara, pra që Irani ka sponsorizuar katër grupe, njeri prej tyre përgjegjëse për sulme të tjera si në Izrael, Arabi Saudite dhe Irak”.
Sa për faktin se SHBA vijon marrëdhëniet me Iranin, Rama dha këtë arsyetim:
“Ne jemi aleat i fortë i SHBA, e dimë rolin tonë dhe nuk na takon neve të merremi me vendime të mëdha, por kemi jetuar në një regjim të ngjashëm, që nuk ishte religjioz por ateist, dhe nga eksperienca mund të them se të merresh me këto regjime nuk më duket vizion largpamës”.
Ndërsa për Rusinë, Rama tha gjithashtu se me këtë vend, dikur miq e jo miq në komunizëm, në demokraci s’ishte parë e arsyeshme të kishte marrëdhënie të ngushta.
“Shqipëria ka një histori të veçantë. Kemi qenë Koreja e veriut e Europës, nuk kishim lidhje me Kremlinin në 30 vjet demokraci nuk kemi patur lidhje të ngushta me Kremlinit, kurrë një president rus nuk ka ardhur në Shqipëri, dhe nuk më mungon kjo gjë. Ne si vend nuk varemi shumë nga gazi, nuk është e vështirë të mbash një qëndrim të fortë kur vetëm 1 përqind e popullsisë mbështet Putin dhe të gjithë mbështesim Ukrainën”, tha ai. /tesheshi.com/
