Kryeministri Rama ka premtuar zhdëmtim për gjithë familjet e prekura nga përmbytjet e këtyre dy ditëve. Por duke qenë se të tilla raste shoqërohen nga dallavere, abuzivitet dhe padrejtësi, ai ka kërkuar që gjithçka të jetë sa më transparante.
“Fatura e zhdëmtimeve dhe kompensimeve duhet përgatitur me transparencën dhe seriozitetin më të madh, që askush nga njerëzit e prekur dhe familjet në nevojë të mos mbetet jashtë listës. Planet për rivendosjen e situatës normale të infrastrukturës duhen përgatitur me shpejtësi”, tha Rama, pasi mblodhi në mesditë Komitetin e Koordinimit dhe Menaxhimit të Emergjencave Civile.
Duke e konsideruar të tejkaluar situatën e rëndë, Rama tha se tashmë është koha e verifikimit të dëmeve në terren.
“Identifikimi dhe inventarizimi i dëmeve dhe pasojave, duke renditur banesat të parat, pastaj rrugët, urat, shkollat që janë prekur dhe ku duhet ndërhyrë menjëherë për të bërë të mundur që mësimi të nisë sa më parë”, tha Rama, ku ndër të tjera ka vlerësuar faktin se sipas tij, edhe pse reshjet kanë qenë më të shumta se ato të tre viteve më parë, pasojat kanë qenë më të vogla, mu prej investimeve të kryera. /tesheshi.com/
