Kryeministri Rama është treguar kritik me BE-në lidhur me qëndrimin e saj karshi Ballkanit. Duke folur gjatë një interviste për amerikanen prestigjoze Politico, shefi i ekzekutivit shqiptar tha se Europa duhet ta ketë në vëmendje këtë pjesë të saj, pasi parndryshe do ketë pasoja.
“Ka një mungesë mirëkuptimi, një mungesë vizioni në faktin se nuk po kuptohet që jo vetëm rajoni ka nevojë për Europën, por edhe që Europa ka nevojë për rajonin për sigurinë dhe stabilitetin. Si mund të jetë unioni i sigurt nëse Ballkani çmendet? Si mundet që Bashkimi Europian të lejojë që në zemër të tij të krijohet një zonë gri ku aktorë të tjerë të kenë më shumë influencë se vetë BE-ja? Ky është një absurditet në termat e sigurisë dhe stabilitetit”, tha Rama.
Ndërkohë, kryeministri shqiptar ka përfshirë në komentet e tij edhe një bashkim të mundshëm mes Shqipërisë dhe Kosovës, nëse gjithnjë sipas tij, Europa do tregohet refraktare ndaj vendeve të Ballkanit.
“Unë nuk e përjashtoj këtë mundësi, pasi e vetmja mënyrë që t’a mbash Ballkanin në këtë situatë paqësore dhe bashkëpunuese është duke i mbajtur rrugën drejt antarësimit në BE të hapur, t’i japësh një perspektivë të qartë si dhe t’i japësh një ndjenjë pozitive rreth unionit. Askush nuk do të donte bashkime të vogla, të gjithë duan të jenë pjesë e bashkimit të madh. Por, nëse nuk ka shpresë, nuk ka perspektivë dhe nuk ka hapësirë, atëherë, sigurisht që bashkimet e vogla mund të ndodhin”, tha Rama, duke aluduar kështu tek rasti i Shqipërisë me Kosovën. /tesheshi.com/
