Kryeministri Rama realizoi ngjashëm në Itali, Milano, atë që realizoi në Athinë pak javë më parë me emigracionin shqiptar: një tubim, i cili tej notave atdhetare, ngjan si një test politik për të vëzhguar votën e mundshme të diasporës, nëse vendoset që ajo të votojë në zgjedhjet e vitit të ardhshëm.
Rama përdori pothuajse të njëjtën narrativë para turmës së emigrantëve shqiptarë në Itali, që ndryshe nga tubimi i Athinës, veç flamujve shqiptarë mbanin edhe italianë. Por aty, ai goditi rëndë Greqinë me anë të një fraze: “Ju nuk ndërruat emrat, siç u ndodhi tragjikisht vëllezërve dhe motrave në Greqi, për një arsye të vetme, që do mbetet një njollë turpi në historinë e Evropës demokratike”, tha Rama.
Gjithsesi, ai vlerësoi mikëpritjen greke për shqiptarët, si dhe atë të italianëve, por dhe bëri diferencën mes tyre. “Italia e kohës fatmirësisht nuk ishte Greqia e asaj kohe. Jo vetëm populli italian njësoj si populli grek u hapi derën bujarisht shqiptarëve duke i ndihmuar të ngriheshin mbi këmbët e tyre, por edhe qeveritë italiane megjithëse tejet të trembura nga fenomeni i saposhfaqur i migrimit masiv drejt brigjeve të Italisë, u sollën me Shqipërinë si askush tjetër”.
Nga ana tjetër, Rama kundërshtoi ashpër shifrën akuzuese ndaj qeverisjes së tij për ikjen e një milion shqiptarëve në dhjetë vjet.
“Shqipëria sot pret dhe ju si vendlindja juaj që rilind çdo ditë dhe më në fund po bëhet shtet. Shumë i ka munguar shqiptarëve të Shqipërisë. Disa gojë nga ato që ju i njihni mirë thoshin këto ditë që nuk duhet të vija këtu pasi nën udhëheqjen time kanë ikur një milionë shqiptarë. Kjo e një milion shqiptarëve të ikur në dhjetë vitet e fundit është gënjeshtër e madhe e ligë dhe e turpshme njësosh si ajo e autobësve që doli po nga ajo gojë e pistë duke ofenduar shqiptarët e Greqisë që u shkrinë si lumi në det për të treguar dashurinë e mallin e manifestuan krenarinë e ture për shqiptarinë e Shqipërinë.
Po e vërtetë kanë ikur edhe këto dhjetë vite shumë shqiptarë, shumë më tepër se janë kthyer. Por Shqipëria e katandisur në 1.5 milion banorë, e mbytur në detin e korrupsionit e nuk ka as punë as shpresë është një Shqipëri që ekziston vetëm në humnerën e atyre gojëve që në ditën e pavarësisë së Shqipërisë dhe që prej asaj dite armiqtë më të ligë të vet i patë nga radhët e parisë së vet”, tha kryeministri. /tesheshi.com/
