Kreu i PDSH-së së Luginës së Preshevës, Ragmi Mustafa, shpjegoi arsyet se përse ishte pranishëm në çadrën e opozitës në Tiranë, i dyti pas Kim Mehmetit, prej shqiptarëve të njohur nga rajoni.
“Jemi këtu për të mbështetur demokracinë, sepse këto protesta që zhvillohen në çadër janë jo të dhunshme. Mbase sot kemi arritur që t’i tërhiqet vëmendja kryetarit Basha që në këto zgjedhje që janë në Shqipëri mos të harrohet Lugina e Preshevës”, tha Mustafa për Ora News.
Më tej politikani shqiptar, tha se me atë që po ndodh në Luginë, mohimin e të drejtave të shqiptarëve nga shteti serb, po tentohet asimilimi i shqiptarëve.
“Kjo sjellje e Serbisë pa dyshim është përpjekje e vazhdueshme për të asimiluar shqiptarët, por aq më shumë u jep forcë shqiptarëve që të këmbëngulin në këto të drejta dhe të identifikohen me flamurin kombëtar siç identifikohen shqiptarët në Shqipëri, Kosovë, Maqedoni, Mal të Zi e gjithandej. Prandaj, një përpjekje e vazhdueshme e Shqipërisë në këtë fushë duhet të jetë më e intensifikuar në një shkallë më të lartë”, tha Mustafa. \tesheshi.com\
