Nga Blendi Gashi
Pak ditë më parë, më 9 dhjetor u bë një vit kur Isa Mustafa u votua si kryeministri i qeverisë së re të Kosovës.
Në fjalën e tij pas mandatimit në krye të ekzekutivit, Mustafa u zotua se do të punonte me përkushtim e ndershmëri për zhvillimin e vendit.
Por, pas një vit qeverisje, situata ekonomike ka mbetur e njëjtë, papunësia në shifra enorme dhe brengat e qytetarëve vetëm sa janë rritur.
Që në ditët e para qeveria Mustafa është përballur me protesta e pakënaqësi të ndryshme qytetare, me ikje masive ilegale të qytetarëve nga vendi në drejtim të shteteve perëndimore, derisa manifestimet e opozitës kundër dy marrëveshjeve të nënshkruara nga qeveria, asaj për Asociacionin e Komunave me shumicë serbe dhe Demarkacionit me Malin e Zi po vazhdojnë edhe sot nëpër qytete të ndryshme të vendit.
Punën e Qeverisë e ka monitoruar në vazhdimësi edhe Instituti për Hulumtime dhe Analiza Sociale (IHAS).
Portali, mbarëkombëtarë tesheshi.com ka realizuar një bisedë me drejtorin e këtij Instituti, Arian Janova, i cili ka folur për punën një vjeçare të qeverisjes Mustafa-Thaçi.
Drejtori i IHAS thotë se puna një vjeçare e qeverisë, kryesisht është kushtëzuar me bisedimet me Serbinë që janë mbajtur në Bruksel.
Ai thotë se koalicioni qeverisës PDK –LDK- Lista Serbe, që në fillim të punës u përballë me pakënaqësi qytetare si pasojë e fyerjeve nga njerëz të kabinetit qeveritar (ministri i shkarkuar Alkesandër Jablanoviq) drejtuar nënave gjakovare.
Themelimi i Speciales, dështim në start i qeverisë Mustafa
Drejtori Janova shprehet se qeveria e udhëhequr nga Mustafa – Thaçi është përballur me disa sfida kryesore dhe është kushtëzuar me disa faktorë që përveç bisedimeve me Serbinë janë edhe themelimi i Gjykatës Speciale, situata jo e favorshme ekonomike në vend si dhe marrëdhëniet e vështira e partite opozitare.
Ai numëron disa dështime të qeverisë që kanë ndodhur gjatë punës një vjeçare, premtime të cilat mbetën në letër por nuk u realizuan asnjëherë, si luftimi i korrupsionit, punësimi, zhvillimi ekonomik i vendit, shëndetësi më e mirë, arsim më cilësorë, rritje të njohjeve etj.
“Themelimi i Gjykatës Speciale mund të konsiderohet në start një dështim pasi që përbrenda koalicionit kishte mungesë të koordinimit dhe pakënaqësi të shumta, mirëpo pas shumë presioneve të bëra tek deputetët në fund ky synim i qeverisë u realizua me votat e pozitës”.
“Zhvillimi dhe rritja ekonomike janë cilësuar prioritete të qeverisë Mustafa, konkretisht kryeministri Mustafa në planprogramin qeverisës pati premtuar rritje të GDP-së vjetore 7 %, por që rritje reale gjatë ketij viti ka pak mbi 3%”.
“Shifrat 6 shifrore të punësimit janë premtime elektorale dhe pas formimit të koalicionit qeverisë, kryeministri në deklarimet e tij premtoi punësim vjetor në normën prej 5% të papunëve vjetor, mirëpo ky punësim ka mbetur vetëm një premtim që le për të shpresuar”.
“Situata jo e mirë në fushën e arsimit në të gjitha nivelet e tij deri tek niveli i arsimit të lartë, ku ndikimi i politikës në këtë sektor ishte i dukshem”.
“Mungesa e një strategjie nga ana e qeverisë për luftimin e korrupsionit, pikë kjo e cila është gjetje kyqe edhe në Raportin e Progresit”.
“Emërimet politike në Bordet e pavarura dhe në institucionet tjera siç është Gjykata Kushtetuese janë mjaft shqetësuese për faktin që për këto vërejtje kanë dhënë edhe ambasadorët e vendeve mike në Kosovë”.
“Njohjet janë një dështim i radhës i qeverisë Mustafa, ku për një vit pune janë arritur një numër minor i njohjeve, kurse pritjet kanë qenë më të mëdha”.
“Si pritoritet i rendit të parë nga qeveria konsiderohet edhe sektori i shëndetësisë, por buxheti për këtë sektor në veçanti në sektorin e furnizimit me barna është zvogëluar për rreth gjysmë milioni euro”.
“Mosanëtarsimi në UNESCO, ku fokusi kryesor i MPJ-së ishte në këtë sektor dhe u shpenzua një shumë e konsiderueshme e mjeteve për udhëtime zyrtare, është një dështim i cili mund të konsiderohet si fitore për shtetin fqinjë”.
“Mungesa e dialogut me opozitën, vë në pikpyetje premtimin e kryeministrit për dialog dhe bashkëpunim me minorancën politike”.
“Ndër çështjet me prioritare dhe e cila është dashur të jetësohet qysh në ditët e para të këtij mandati qeverisës është krijimi i Forcave të Armatosura, por që ende nuk është sponsorizuar nga qeveria në tryezen e Kuvendit”, thotë Janova.
MSA: suksesi më i madh, ja sfidat që e presin ekzekutivin
Drejtori i Institutit për Hulumtime dhe Analiza Sociale, Arian Janova, thotë se gjatë punës një vjeçare Qeveria ka pasur edhe disa të arritura si nënshkrimi i marrëveshjes së Stabilizim Asocimit, rritja e asistencës sociale si dhe tentative e kryeministrit për të sjellë investiturë të huaj në vend.
“Në fillim të mandatit qeverisës kryeministri Mustafa mori vendim për uljen e shpenzimeve qeveritare, vendim ky i cili u përshëndet nga shoqëria civile dhe njohësit e fushës dhe qytetarët në përgjithësi”.
“Rritja e asistencës sociale nga ana e qeverisë konsiderohet si vendim i cili ndikoi drejtpërdrejt sadopak në mirëqeninen e qytetarëve të kësaj kategorie”.
“Nënshkrimi i Marrëveshjes së Stabilizim Asocimit është e arritur në aspektin ndërkombëtar, konkretisht në rrafshin e integrimeve evropiane. Me këtë konsiderohet që Kosova është një hap me afër Bashkimit Evropian dhe cilësohet si hap i cili ndikon edhe në investimet e huaja në Kosovë”.
“Vizitat dhe tentativat e kryeministrit Mustafa për sjelljen e investitorëve të huaj, konkretisht i disa kompanive serioze të gjermanisë, konsiderohet si sinjal pozitiv që në të ardhmen mund të ndikoj në zhvillimin dhe rritjen ekonomike të vendit”, është shprehur Janova.
Drejtori i IHAS duke folur për sfidat që e presin ekzekutivin e vendit, ka thënë se ato do të jenë të njëjta si edhe këtë vit, si luftimi i korrupsionit dhe krimit të organizuar, formimi i ushtrisë së Kosovës, vazhdimi i dialogut me Serbinë, zbutja e papunësisë e tema të tjera relevante. /tesheshi.com/
