Qeveria e Kosovës miratoi raportin e punës së komisionit shtetëror për përcaktimin e kufirit, në mbledhjen e radhës, përkundër një letre të kreut të AAK-së që kërkonte pezullimin e punës së demarkacionit me Malin e Zi.
Në këtë kontekst, kryeministri Mustafa dhe zëvendësi i tij, Hashim Thaçi deklaruan qartë se përcaktimi i kufirit me Malin e Zi nuk e ndryshon territorin e Kosovës për asnjë centimetër katror.
Kreu i komisionit shtetëror, Murat Meha ishte i pranishëm më mbledhjen e Qeverisë për të paraqitur raportin.
“Ajo për të cilën ne jemi të interesuar është se, a ndryshon sipërfaqja e Republikës së Kosovës me rastin e përcaktimit të këtij kufiri? Komisioni ka dëshmuar se sipërfaqja nuk ndryshon për asnjë centimetër katror dhe po ashtu nuk ndryshon sipërfaqja e komunës së Pejës”, deklaroi kryeministri Isa Mustafa.
Komisioni, përmes kryetarit Meha sqaron se me dokumentim në formë analoge dhe dixhitale vërteton se territori i Kosovës nuk ndryshon për asnjë cm katror dhë komuna e Pejës, që ka pasur në territorin e vet 602.2 km në vitin 1974, të njëjtën sipërfaqe ka edhe sot.
Punën e komisionit e mbështeti edhe zëvendëskryeministri Thaçi, i cili tha se puna e komisionit jep garanci se ky proces nuk tjetërson territorin e Kosovës.
Sipërfaqja e Kosovës, sipas raportit të komisionit, është në përputhje me Kushtetutën e vitit 1974, me planin e Ahtisarit dhe Kushtetutën aktuale.
Megjithatë, procesi i demarkacionit pritet të shoqërohet me qëndrime të kundërta. Ekspertë e drejtues të opozitës, pretentojnë se Mali i Zi do t’i marrë Kosovës të paktën 12 mijë hektarë tokë, në bjeshkët e Rugovës dhe prona private të banorëve. /tesheshi.com/
