Qeveria e Kosovës nuk e ka proceduar në Kuvend draft-ligjin me të cilin mundësohet shndërrimi i Forcës së Sigurisë së Kosovës (FSK) në Forca të Armatosur të Kosovës (FAK) edhe pas rreth një muaji prej se Ministria e FSK-së, e ka dërguar atë në Qeveri. Ndërkohë, që anëtarët e Komisionit për Mbikëqyrjen e FSK-së janë shprehur të habitur me këtë vonesë.
Përfaqësuesit e partive opozitare këtë vonesë të Qeverisë e kanë vlerësuar si lojë të ekzekutivit me ushtrinë e vendit, shkruan sot ‘Zëri’. Ata më tej kanë thënë se çështja e formimit të ushtrisë nuk duhet të futet në ndonjë “pazar” politik me Listën Serbe. Kurse sipas analistëve politikë vështirësi për formimin e ushtrisë mund të paraqesë edhe aspekti financiar.
Vështirësi në krijimin e ushtrisë do të paraqesë edhe Lista Serbe, pasi për tu marrë vendimi për krijimin e ushtrisë së Kosovës, duhen votat e shumicës së kuvendit dhe votat e dy të tretave të komuniteteve joshqiptare që janë në Kuvendin e Kosovës./tesheshi.com/
