Të kontaktosh me zëdhënësin e Qeverisë së Kosovës, Arban Abrashi, është po aq e vështirë sa me secilin anëtar të kabinetit qeveritar. Ky veprim ka irrituar gazetarët kosovarë. AGK-ja i bënë thirrje kryeministrit që ta rishikoj vendimin për emërimin e Abrashit në postin e zëdhënësit
Prishtinë – Ka rreth një muaj që kryeministri i Kosovës, Isa Mustafa, e ka emëruar ministrin e Punës dhe Mirëqenies Sociale, Arban Abrashi, zëdhënës të Qeverisë, por që në fakt, gazetarët kosovar vazhdojnë të kenë probleme në raport me informatat pothuajse siç kanë pasur gjatë gjithë qeverisë “Thaçi 2”, ku i tërë mandati qeverisës është përmbyllur pa zëdhënës.
Madje, emërimi i njërit nga ministrat e kabinetit qeveritar edhe në postin e zëdhënësit, më shumë se asgjë tjetër ia ngjanë qeverisjes së kaluar – kur rolin e zëdhënësit e bënte ministri i atëhershëm i Drejtësisë, Hajredin Kuçi, i cili, në të shumtën e rasteve ishte i pakontaktueshëm, ndërsa mesazhi telefonik ishte mundësia e vetme për ta kontaktuar.
Për më tepër, pavarësisht se Abrashi tashmë është emëruar zëdhënës i Qeverisë, nuk ka ditë që në kronikat televizive, në mediet elektronike, dhe ato të shtypit nuk raportohet se si zëdhënësi i Qeverisë nuk është lajmëruar në telefon.
Për të vërtetuar këtë fakt, portali TeSheshi ka provuar ta kontaktojë zëdhënësin Abrashi, por, të martën në orën 13:43, ai nuk është lajmëruar në asnjërin nga dy telefonat e tij mobil.
Kryetari i Asociacionit të Gazetarëve të Kosovës, Zekirja Shabani, thotë se zëdhënësi i Qeverisë së Kosovës, Arban Abrashi më së paku, deri më tani, po e kryen punën për të cilën është caktuar ditë më parë.
“Ai thuajse është i pa qashëshëm nga gazetarët të cilët kërkojnë informacion për zhvillimet në ekzekutiv. Në këtë mënyrë Qeveria e Kosovës po e dëshmon jotransparencën e vet karshi qytetarëve. Kjo praktikë e mungesës së bashkëpunimit me gazetarët, është në kundërshtim me ligjet e zbatueshme në vend dhe cenim i lirisë së medies dhe të drejtës për informim të drejtë të qytetarëve”, thotë ai.
Gazetari Shabani thotë se AGK-ja kërkon nga kryeministri Isa Mustafa që të rishikoj edhe njëherë vendimin për emërimin e zëdhënësit, në mënyrë që atyre t’iu krijohet qasje në informacion.
Ndërsa, gazetari i Radios Evropa e Lirë, Zijadin Gashi, thotë se emërimi i një zëdhënësi me postin e ministrit, duket se më shumë ishte një thikë me dy teha apo një kamuflim sa për të vepruar diçka.
“Kjo pasi që ne të gjithë e dimë që ministrat kanë agjenda bukur të ngjeshura dhe nuk do të mund të jenë në dispozicion të gazetarëve dhe medieve, kur ata kanë nevojë për një deklaratë, qëndrim apo pozicion të qeverisë apo kryeministrit karshi zhvillimeve politike”, thotë ai.
Gazetari Gashi thekson se mediet do të vazhdojnë ta kenë shumë sfiduese marrjen e deklaratave në qeveri, pasi që dera për gazetarët në atë godinë do të vazhdon të mbetet e mbyllur.
Nga ana tjetër, Erzen Vraniqi nga Lëvizja Vetëvendosje, thotë se Qeveria e Kosovës si institucion kryesor ekzekutiv në vend duhet të gjejë mënyrën adekuate që të komunikojë me opinionin publik, dhe assesi mos të kufizohet vetëm në një zëdhënës.
“Kjo më së mirë bëhet me ndërmjetësimin e zyrës për marrëdhënie me publikun me media. Çështja e zëdhënësit nuk është patjetër, sepse nuk është e domosdoshme vetëm një person i caktuar të komunikojë me media. me rëndësi është të ketë komunikim të rregullt, dhe pastaj, a bëhen prononcimet vetëm nëpërmjet zëdhënësit apo ministrave e zëvendësministrave pak ka rëndësi”, thotë ai. /TeSheshi/
