QËNDRIMET/ Tjetër vulë amerikane për 25 prillin, tjetër thirrje për PD-në

Zëri i SHBA në Tiranë, ambasadorja Yuri Kim, i kërkoi PD-së që të pranojë rezultatin e 25 prillit, ndërkohë që u shfaq e kënaqur me faktin se në shtator do jetë në parlament, pa e çuar në mend bojkotin.

Pikëpamja jonë është shumë e qartë. Në deklaratën që nxorëm nga Uashingtoni, vërejtëm se është me rëndësi që të gjitha partitë të njohin rezultatet e zgjedhjeve”, tha Kim, duke shtuar: “Po të shohësh deklaratat nga Lulzim Basha dhe kushdo tjetër në PD, bëjnë shumë të qartë që pavarësisht çfarëdo kundërshtimesh që kanë, do të jenë në parlament në shtator. Dhe kjo është vërtet e rëndësishme”.

 Për SHBA, zgjedhjet ishin “Ok”.

“Mendoj që ODIHR, që janë vërtet ekspertët për zgjedhjet, kanë nxjerrë gjetjet e tyre fillestare dhe ne i kemi mbajtur shënim. Për shembull, ata vërejnë që zgjedhjet ishin të rregullta dhe përgëzuan autoritetet për administrimin e zgjedhjeve shumë mirë.

Megjithatë, vërejtën edhe disa probleme dhe pritshmëria jonë, si SHBA, është që ato probleme do të trajtohen, por për pjesën më të madhe, siç e patë në deklaratën që nxorëm nga Uashingtoni, përgëzuam popullin shqiptar për zgjedhje të mira, uruam Kryeministrin Rama për fitoren.

Po ashtu, uruam edhe partinë e opozitës për zhvillimin e një fushate shumë të fortë.

Prandaj mendoj që në tërësi, jemi të kënaqur me mënyrën si u zhvilluan zgjedhjet”, tha Kim në Opinion.

Në një tjetër qëndrim, ajo kitikoi median se përse nuk e trajtoi faktin që SPAK procedoi pronarin e Ora News.

“Për shembull, verën e shkuar, u shpall një çështje e madhe, e cila përfshinte trafikun e drogës që ka një lidhje me median dhe biznesin. Ju nuk flisni për të dhe pastaj të gjithë pretendoni që nuk po ndodh asgjë. Ka prokurorë, ka mjekë, ka të tjerë që po hetohen.

Tani, nëse më thua që askush nuk do ta besojë deri sa politikani më i madh apo, kushdo tjetër, të jetë në burg, mendoj që po injoroni faktet dhe vazhdoni  propagandën.

Thjesht nuk është e vërtetë që nuk ka përparim. Në fakt, ka pasur përparim të jashtëzakonshëm. Pra, nuk mund të më thuash nga njëra anë që i pranon shifrat e mia, por nga ana tjetër nuk pranon të vërtetën për atë që po ju them”, tha Kim, duke mbrojtur punën e SPAK. /tesheshi.com/