Putin planifikon sulme ajrore në Siri: nëse nuk arrihet marrëveshje me SHBA-në

Presidenti rus, Vladimir Putin përgatitet të ndërmarrë sulme ajrore mbi Siri kundër Shtetit Islamik nëse Shtetet e BAshkuara refuzojnë propozimin e tij për të bashkuar forcat në këtë përpjekje. Lajmin e bën të ditur agjencia Bloomberg duke cituar dy njerëz të afërt me Kremlinin.

Rusia ka shtuar praninë ushtarake brenda Sirisë dhe furnizimet me armë për ushtrinë siriane si pjesë e përshkallëzimit të mbështetjes për aleatin e vjetër, presidentin Bashar al-Assad. Këto veprime kanë nxitur paralajmërime për destabilizmin e mëtejshëm të rajonit, nga ana e vendeve perëndimore që janë kundër Assad-it.

Një burim diplomatik tha për agjencinë Reuters se Moska sheh një shans në rritje për marrëveshje ndërkombëtare në luftën ndaj terrorizmit në Siri dhe dhënien fund të krizës që është shtrirë tashmë në vitin e pestë të saj.

Bloomberg raportoi se kursi i preferuar i Putinit për veprim në Siri është ai i marrëveshjes me SHBA dhe aleatët e saj për koordinimin e fushatës kundër militantëve të Shtetit Islamik, me Rusinë, Iranin dhe ushtrinë siriane. /tesheshi.com/