Putin flet për fakte drithëruese në përvjetorin e parë të aneksimit të Krimesë

Një vit pas aneksimit të Krimesë, presidenti rus, Vladimir Putin, pohoi se ai kishte marrë në konsideratë vënien në gjendje gatishmërie të forcave bërthamore gjatë revolucionit të shkurtit të shkuar në Kiev, që përfundoi me rënien e qeverisë së prorusit Viktor Janukoviç.

Në një dokumentar të transmetuar nga televizioni shtetëror rus, presidenti rus u pa të shprehej se ai ishte gati ta ndërmerrte një lëvizje të tillë për të mbrojtur qytetarët rusishtfolës në Ukrainë, e më së shumti në gadishullin e Krimesë, të cilin e konsideron pjesë historike të Rusisë. Fjalët e Putinit bënë të ditur se bota ka qenë në prag të një lufte të mundshme bërthamore më 28 shkurt të 2014-ës.

Presidenti rus paraqitet në dokumentar si shpëtimtar i Krimesë. Në të ai pohon gatishmërinë për t’i vënë në alarm forcat bërthamore, dhe deklaron se ishte i përfshirë personalisht në aneksimin e Krimesë.

Ai shton se synimi nuk ishte aneksimi, por dhënia mundësia njerëzve të organizojnë një referendum për të zgjedhur si të jetojnë.

“Në dritën e asaj çka po ngjiste në Ukrainë, ne nuk mund ta linim vetëm popullin e Krimesë,” shprehet ai.

Referendumi mbi statusin e Krimesë, i zhvilluar më 16 mars 2014, lejoi ndarjen e Krimesë nga Ukraina, ndërsa më shumë se 96 për qind e njerëzve votuan për integrimin e rajonit në Federatën Ruse.

Rusia miratoi një projektligj pas referendumit që e njihte si shtet të pavarur Krimenë, rajonin autonom të Ukrainës.

Megjithatë, rezoluta 68/262 e Asamblesë së Përgjithshme të OKB-së mbi integritetin territorial të Ukrainës e dënoi referendumin.   /tesheshi.com/