I katërti titull kampion për PSG-në u sigurua dje me një fitore mjaft të thellë në takimin ndaj Troyes-it.
Tetë javë para fundit të kampionatit, suksesi u arrit në fushën e ekipit të fundit në renditje me një fitore 0-9. Një festival golash pati në stadiumin “Stade de l’Aube”, ku protagonist qe suedezi Ibrahimoviç. Katër janë golat që mbajnë firmën e golashënuesit më të mirë të kampionatit francez.
Protagonist qe ai dhe pas ndeshjes, kur deklaroi se sezoni i ardhshëm do ta gjente diku tjetër.
“Për momentin, nuk do të jem te PSG-ja sezonin tjetër. Kam ende një muaj e gjysmë të mbetur këtu.”
Sulmuesi 34-vjeçar, që ka një karrierë të pasur futbollistike, e që ka luajtur me një sërë skuadrash me emër, gjeti vend dhe të bëjë shaka: “Do të qëndroj nëse e zëvendësojnë kullën Eifel me statujën time.”
Ibrahimoviç është elementi më thelbësor te PSG-ja, edhe pse organika e klubit të kryeqytetit francez ka në të shumë emra të tjerë të spikatur në arenën ndërkombëtare. Vetë presidenti i klubit nuk e ka fshehur dëshirën që ai të qëndrojë.
PSG-ja e garantoi dje fitimin e kampionatit pasi diferenca prej 25 pikësh me Monakon e vendit të dytë nuk është e arritshme as matematikisht. /tesheshi.com/
