Nga Blendi Gashi
Opozita e bashkuar kosovare VV, AAK, NISMA së bashku me përkrahësit e tyre do të çohen sërish në këmbë.
Kërkesë kryesore e opozitës në protestën e nesërme edhe zyrtarisht do të jetë largimi i koalicionit qeverisës PDK-LDK nga pushteti, për dallim nga protestat e kaluara ku kërkesë e tyre ishte anulimi i marrëveshjeve për Asociacionin dhe Demarkacioinin.
Drejtuesit e partive opozitare kanë premtuar se do të protestojnë paqësisht së bashku me familjet e tyre dhe nuk synojnë marrjen e pushtetit me dhunë, por se nuk do t’i ndalin protestat derisa të largohet qeveria aktuale.
Por përkundër kësaj, drejtuesit të pushtetit pohojnë se partitë opozitare po thirrin qytetarët në protesta të dhunshme.
Duke parë acarimin e madh në mes partive në pozitë dhe opozitë, nuk përjashtohet mundësia që skenari i cili ndodhi më 28 nëntor të vitit 2014-të të përsëritet edhe ditën e nesërme.
Në rast se deputetët opozitarë që janë në arrest shtëpiak thyejnë këtë masë, mund të nxitet pushteti që të ndërmarrë masa dhe të arrestojë opozitarët ashtu siç ndodhi më 28 nëntor kur pas përfundimit të protestës arrestuan Albin Kurtin i cili u paraqit në protestë dhe më pas ndodhi edhe eskalimi i situatës.
Një nga deputetët që është në arrest shtëpiak, Glauk Konjufca i VV-së, ka bërë të ditur se do të jetë prezent në protestën e 9 janarit duke thënë se pret që një gjë të tillë ta bëjnë edhe kolegët e tjerë ndaj të cilëve është edhe masa e njëjtë.
Megjithatë, Fatmir Limaj, kryetar i partisë opozitare NISMA për Kosovën ka thënë në një emision se personalisht mendon që deputetët të cilët janë në arrest shtëpiak duhet të respektojnë masën që është shqiptuar ndaj tyre dhe nuk duhet të jenë prezent në protestë.
Arrestimi i sërishëm i opozitarëve, eskalon edhe më shumë situatën
Analistët politikë thonë se edhe nëse deputetët opozitarë thyejnë masën e arrestit shtëpiak dhe dalin në protestë, nuk duhet të arrestohen nga policia pasi do të eskalojë situata dhe do të përsëriteshin skenat që ndodhën më 28 nëntor të 2014-tës.
Analisti Florim Zeqa, thotë se është vështirë të dihet saktë për atë se çfarë do të ndodhë në protestën e 9 janarit, megjithatë thotë se disa gjëra mund të konstatohen.
Zeqa, në një prononcim për tesheshi.com thotë se në protesta e së shtunës pritet të jetë më masive se herave tjera, për shkak të evolvimit të situatës pas verdiktit të Gjykatës Kushtetuese, e cila konstatoi shkeljet e Kushtetutës në marrëveshjen e Brukselit të 25 gushtit në hiç më pak se 22 nene dhe akte nënligjore.
Ai thotë se pjesëmarrja eventuale e deputetëve të opozitës që gjenden në arrest shtëpiak në protestë, në asnjë rrethanë nuk do duhet marrë si shkas nga pushtetarët për arrestimin e tyre, edhe pse në secilin vend demokratik thyerja e masës së arrestit shtëpiak është e papranueshme dhe e dënueshme .
“Skenari i mundshëm i pozitës, i pushtetit në këtë rast për arrestimin e deputetëve nën masën e arrestit shtëpiak gjatë një proteste paqësore, do të ishte skenari më i keq dhe më fatal për vendin, ngase eskalimi i situatës kësaj radhe mund të prodhojë dhunë të paparashikuar dhe dëme enorme të pronës publike dhe shtetërore”, thotë Zeqa.
Njohësi i rrethanave politike në vend, Islam Krasiqi thotë për tesheshi.com se inatet politike mes përfaqësuesve të popullit kanë kaluar çdo kufi por shpreson që protesta e 9 janarit të jetë paqësore dhe të mos përsëritet ngjarjet që ndodhën më 28 nëntor.
Ai thotë se Policia e Kosovës do të jetë më e kujdesshme dhe do të mundohet që të mbajë protestën nën kontroll, edhe pse një gjë të tillë nuk do ta ketë aspak të lehtë.
“Deputetët e bllokut opozitarë nuk do të respektojnë vendimin e gjykatës. Ata pritet të jenë prezent në protestë edhe pse janë në arrest shtëpiak, sepse nuk i kanë respektuar asnjëherë fletëthirrjet e prokurorisë dhe të gjykatave. Përkundër kësaj Policia Kosovës nuk besoj se do të ndërhyjë në protestë për arrestimin e deputetëve që kanë shkelur urdhrin ndëshkimor me qëllim të mos ketë eskalim të situatës”, thotë Krasniqi.
Mbështetësit e opozitës nga të gjitha komunat e Kosovës do të mblidhen në kryeqytet, konkretisht tek Biblioteka Universitare dhe më pas në ora 14:00 do të marshojnë drejt sheshit “Skëndërbe”, para Qeverisë ku edhe liderët e partive në opozitë pritet të mbajnë fjalim me kërkesë kryesore largimin e Thaçit dhe Mustafës nga pushteti. /tesheshi.com/
