Scott Fairlamb, i cili u filmua duke goditur një oficer policie gjatë një sulmi vdekjeprurës në Capitol-in e SHBA-së në fillim të këtij viti, mori një dënim me 41 muaj burg të mërkurën.
Ky është dënimi më i rëndë i vendosur deri më tani në pothuajse 700 çështje penale të iniciuara që kur mbështetësit e ish-presidentit amerikan Donald Trump sulmuan Capitol-in më 6 janar të këtij viti, duke mos pranuar humbjen e tij në zgjedhje.
Gjykatësi i qarkut amerikan Royce Lamberth përmendi seriozitetin e sjelljes së pronarit të palestrës në New Jersey, Scott Fairlamb, si një rrethanë të veçantë në dënimin, raporton Reuters.
Fairlamb u filmua duke iu klithur oficerëve të policisë përpara se të shtynte njërin prej tyre dhe ta godiste me grusht në fytyrë. Ai u deklarua fajtor.
“Nëse do të kishit shkuar në gjyq, nuk mendoj se do të kishte pasur një juri që mund t’ju lironte,” i tha gjykatësi Fairlamb-it, kryengritësi i parë i dënuar për dhunë ndaj policisë gjatë sulmit.
Gjykatësi theksoi se ky dënim do të jetë një masë për më shumë se 120 persona të akuzuar për sulmin ndaj policisë gjatë dyndjes në Capitol nga mijëra mbështetës të Trump.
Një oficer policie i Capitol-it i sulmuar nga protestuesit vdiq një ditë pas trazirave dhe katër oficerë policie të përfshirë në mbrojtjen e Capitol-it humbën jetën më vonë. Rreth 140 policë u plagosën.
Avokati i të pandehurit i kërkoi gjyqtarit që të merrte parasysh 11 muajt që klienti i tij kishte kaluar tashmë në paraburgim, ndërsa Fairlamb, nën emocione të forta, iu drejtua gjyqtarit gjatë seancës, duke kërkuar mëshirë dhe duke thënë se kishte turpëruar emrin e familjes së tij.
Prokurorët federalë rekomanduan një dënim me 44 muaj, duke theksuar njohuritë e tij për artet marciale dhe konfliktet e mëparshme me ligjin.
“Deklaratat e të pandehurit atë ditë tregojnë se ai ishte gati për dhunë,” tha Prokurori i Përgjithshëm i SHBA, Leslie Goemaat. /tesheshi.com/
