Artan Lame, kreu aktual i ALUIZNI-it, ose thënë ndryshe “njeriu i Legalizimeve”, ka shpreh qartazi ambicien për të qenë ai kandidati i mazhorancës për kreun e Bashkisë së Tiranës.
Por kush është Artan Lame? Ç`përfaqson ai në politikë?
Artan Lame është një emër që endet mes publicistikës dhe politikës. Në të parën ka një emër jo të vogël, sidomos me rubrikën e tij të njohur “Shqipni tavolinash”, ku veç qasjeve me një stil e narrativë origjinale, të dhënave historike unike, ka ofruar dhe foto të rralla nga një arkiv personal jashtëzakonisht i pasur që posedon.
Ndërsa në politikë do njihet si krahu i djathtë i Edi Ramës si Nënkryetar i Bashkisë së Tiranës pas Blendi Gonxhes, si dhe më pas si zëvëndësministër i Territorit në qeverisjen e Nanos.
Në karrierën e tij politike i njihet dhe një kandidim si deputet më 2005 në zonën e Kavajës, por pa arritur ta fitojë mandatin.
Mes tij dhe Ramës do kishte një ftohje pas zgjedhjeve të 2009-ës. Më saktë do ishte Lame që do e thumbonte, e nganjëherë ta kritikonte haptaz Ramën si kryebashkiak. Tre shkrime të tij: një kushtuar degradimit të Kopshtit Zoologjik, një kushtuar 50 shërbimeve të munguara nga bashkia, e një tjetër për shatërvanin e parlamentit, do ishin pasqyrim i një qasjeje të papritur kritike të Lames ndaj Ramës, të njohur si miq që nga Dhjetori `90.
Do ishin më pas vitet 2011-2013, kur rikthehet raporti miqësor mes tyre, me zgjedhjen e Lames si anëtar Asamblesë në PS.
Pas zgjedhjeve të 23 qershorit, Lames i besohet një prej institucioneve më të përfolura për degradim korruptiv: ALUIZNI, si dhe një prej proçesve me delikate: Legalizimet.
Deri më tani, “Legalizimet” mund të konsiderohen si pararoja e Rilindjes, ku shpresohet të kompensohen votat e humbura nga drejtime të tjera ku zhgënjimi prej Rilindjes po përbën në një psikolgji dominuese. Deri më tani, veç asaj nëse legalizimet po bëhen ose kjo falas, nuk ka patur asnjë të çarë në këtë proçes, që të mund të kontestohet politikisht.
Kështu që, Lame e kërkon Bashkinë e Tiranës me kredencialet e larta të një njeriu që po arrin t`i japë zgjidhje një prej ngërçeve sociale më të rënda që vuan Shqipëria. /tesheshi.com/
