Sot votuesit portugezë do të vendosin nëse do të vazhdojnë të qeverisen nga koalicioni i qendrës së djathtë apo do t’i kthejnë në pushtet socialistët.
Rivalët kryesorë në këto zgjedhje janë përfaqësuesit e qendrës së djathtë, Partia Socialdemokrate e kryeministrit Pedro Passos Coelho, dhe të majtët e Partisë Socialiste, të udhëhequr nga Antonio Costa, një ish-kryetar bashkie i Lisbonës.
Koalicioni i udhëhequr nga Coelho, “Portugali Përpara”, i përbërë nga Partia Socialdemokrate e qendrës së djathtë dhe Partia Popullore konservatore, ka mbështetjen e 38 për qind të votuesve, ndërsa Partia Socialiste e opozitës ka siguruar përkrahjen e 32 për qind të elektoratit. E përkthyer kjo përqindje në numra vendesh në parlamentin me 230 deputetë, koalicioni mund të fitojë nga 99 deri në 114 vende, nga 116 që duhen për një shumicë, kurse socialistët ka gjasa të sigurojnë nga 78 në 95 vende.
Ashtu si Greqia dhe Spanja, Portugalia qe në prag të falimentimit, por ia doli të gjejë rrugëdalje në vitin 2011 me një paketë shpëtimi prej 78 miliardë eurosh. Vitet e mëpastajme të kursimit, ndërsa vendi qeverisej nga Coelho, dhanë efektet e tyre pozitive, pasi ekonomia arriti ta marrë veten. Deficiti buxhetor u reduktua nga 11.2 për qind në 2010-ën në 4.5 për qind katër vite më pas. Ndërkaq, përqindja e papunësisë ka njohur vazhdimisht ulje që nga çereku i parë i vitit të shkuar.
Nëse rizgjidhet, kryeministri Pedro Passos Coelho ka për të qenë i pari udhëheqës europian që do të përkrahet pas zbatimit të masave të kursimit që parashikonte paketa e shpëtimit.
Megjithatë, teksa 15 për qind e votuesve janë ende të pavendosur se për kë do të votojnë, rezultati i zgjedhjeve është i vështirë të parashikohet. /tesheshi.com/
