Nga Blendi Gashi
Konfirmimi i dënimeve nga Gjykata e Apelit për rastin “Drenica”, ka ngjallur reagime të shumta në Kosovë, duke e vlerësuar si një goditje e rëndë për idenë e lirisë, të çlirimit dhe drejtësisë.
Ish komandantë të shumë zonave, familjarë, deputet aktual pothuajse nga të gjitha partitë politike, por jo vetëm kanë reaguar fuqishëm për rastin në fjalë.
Por, çuditërisht dy prej njerëzve kryesorë që tani mbajnë pozita të larta shtetërore, njëherit ish themelues të Ushtrisë Çlirimtare të Kosovës, Hashim Thaçi dhe Kadri Veseli nuk e kanë thënë asnjë fjalë pas rikonfirmit për 50 vjet dënim me burg për grupin “Drenica”.
Të dy personat në fjalë reaguan vitin e kaluar kur Gjykata Themelore e Mitrovicës dënoi grupin e “Drenicës”, ku Thaçi atëkohë aktgjykimin ndaj Sylejman Selimit dhe të tjerëve e quajti “tendencë për të njollosur drejtësinë”, kurse Veseli e quajti “ndjenjë e rëndë”.
Por, shtrohet pyetja pse as Hashim Thaçi as Kadri Veseli nuk u deklaruan pas rikonfirmimit që bëri së fundmi Gjylata e Apelit për dënimin e ish komandantëve nga Drenica? Pse po heshtin?!
Ndërsa, reagimet plasnin nga të gjitha anët, Thaçi po dje zhvilloi një drekë pune me kryeminsitrin e Shqipërisë Edi Rama në një nga restorantet e Prishtinës, ku sigurisht arsyeja e vizitës mbeti enigmë.
“Uroj që edhe Hashim Thaçi të përfundoj në burg”
Heshtja e Hashim Thaçit pas rikonfirmit të dënimit nga Gjykata e Apelit aspak nuk i ka pëlqyer gruas së ish komandantit Sylejman Selimi (i dënuar me 7 vite burg).
Kimete Selimi, përmes një reagimi në profilin e saj në Facebook ka shprehur gjithë mllefin e saj ndaj Thaçit duke thënë se do të dëshironte që presidenti aktual t’u bashkohet shokëve të tij në burg, sigurisht pasi presidenti nuk u deklarua për dënimin e burrit të saj, por që preferoi të drekoi me mikun e tij Edi Rama.
Gruaja e Selimit e ka mallkuar sistemin e drejtësisë kosovare si dhe presidentin Thaçi.
“Presiden ndoshta ke mendu që heshtja ty do të shpëtoj por jo mos mendo ashtu, se ti duke i mbrojtur kta burra kishe pas shancën ta mbrosh edhe vetveten, por gabuat! Tash dhe juve ju uroj të ju bashkëngjitni Syles, meqë nuk ju bashkëngjitët në vijat frontale, në beteja të lara me gjak, dhe u fshehët skutave aty ku nuk kishte luftime dhe bënit plane për atë se si mbas lufte se kush qka do të gradohet. Syla, asnjëherë se mendoj këtë. Uroj që të paktën ti bashkohesh tash”, është një pjesë e reagimit bërë nga Kimete Selimi, gruaja e ish komandantit Sylejman Selimit, drejtuar presidentit Thaçi.
“Thaçi kur ka telashe të brendshme takohet me Edi Ramën”
Përveç, gruas së Selimit, për heshjen e Thaçit, ka reguar edhe sekretari i partisë NISMA për Kosovën, Bilall Sherifi.
Ai thotë se Thaçi sa herë ka telashe mundohet të fshihet pas kryeministri të Shqipërisë Edi Rama, për çka shton se ky i fundit po sillet si të ishte vartës i Thaçit.
“Edi Rama po sillet sikur të ishte vartës i Hashim Thaçit.
Sa herë që Thaçi ka telashe të brendshme, ai ose shkon te Rama në Tiranë ose e sjellë atë në Kosovë për “drekë/darkë” sikur kësaj radhe!
Ai e solli atë sot në Prishtinë vetëm për një arsye: që lajmin e konfirmimit të aktgjykimeve të padrejta ndaj udhëheqësve dhe ushtarëve të UÇK-së, Sylejmam Selimi dhe të tjerët ta nxjerrë në plan të dytë. Ky është gabim i radhës i Edi Ramës. Natyrisht nëse është gabim.
Së paku dëshiroj që ky veprim i tij të jetë vetëm një gabim.
Sidoqoftë, e siguroj Ramën se nëse mendon se kjo ndihmë që sot ia dha Thaçit do ta forcojë miqësinë mes tyre sërish e ka gabim.
Jo për tjetër gjë, por sepse historia e Thaçit në raport me miqt e tij dëshmon se ky, në jetën e tij, vetëm mik kurrë nuk ka qenë!”, ka shkruar Sherifi, në Facebook.
Ndryshe, Tomë Gashi avokati mbrojtës i Sylejman Selimit, vendimin e Gjykatës së Apelit për rastin “Drenica 2”, e ka quajtur të ndikuar nga politika vendore dhe ndërkombëtare, duke e cilësuar skandaloz dhe një masakër juridike.
Avokati Gashi ka bërë të ditur se rastin dota dërgojn me ankesë në Gjykaten Supreme të Kosovës në Prishtinë, siç ka thënë “me shpresën se atje ndoshta drejtësia do të fitoj dhe nuk do të ketë aktgjykime të këtilla të ndikuara krejtësisht nga politika”./tesheshi.com/
