Një sulm i paprecedentë nga godinës së Top Channel ndodhi në mesnatë me pasojë një të vdekur, roje aty, Pal Kola, 60 vjeç.
Siç thuhej në njoftimin policor, “më datë 27.03.2023, rreth orës 01:00, në Mëzes, në rrethana ende të paqarta, nga persona ende të paidentifikuar, është qëlluar me armë zjarri në drejtim të ambienteve të Top Channel.
Si pasojë e të shtënave ka humbur jetën roja i sigurisë shtetasi P. K., 60 vjeç (punonjës i një shoqërie për ruajtjen fizike të objekteve).
Është ngritur grupi hetimor dhe nën drejtimin e Prokurorisë vijon puna intensive për zbardhjen e rrethanave të ngjarjes, sekuestrimin e provave që do të shërbejnë për zbardhjen e ngjarjes, identifikimin dhe kapjen e autorëve.
Shërbimet e Policisë kanë ngritur pikat e kontrolleve dhe vijon puna për identifikimin e kapjen e autorëve”.
Bëhet me dije se mjeti i autorëve është gjetur i shkrumbuar në Golem të Kavajës dhe brenda saj janë gjetur dhe dy kallashnikovë me të cilën është qëlluar duke marrë një jetë njeriu.
Për ngjarjen e rëndë reagoi dhe kryeministri Rama.
“Agresioni kriminal ndaj TCH me pasojë edhe një humbje jete të personelit të sigurisë, kërkon përgjigje të qartë nga agjencitë ligjzbatuese!
Ngushëllime familjes së të ndjerit dhe krejt bashkësisë së TCH, e cila meriton solidaritetin e të gjithëve në këtë moment kaq shqetësues!”, shkroi i pari i qeverisjes.
Po ashtu reagoi dhe vetë presidenti Begaj.
“Ngjarje vërtet e rëndë ajo e orëve të para të mëngjesit, ku godina e televizionit kombëtar ‘Top Channel është qëlluar me armë, e ku për pasojë ka humbur jetën roja i sigurisë Pal Kola.
Teksa i shpreh ngushëllimet e mia familjes së z. Kola, inkurajoj organet ligjzbatuese ta zbardhin sa më shpejt dhe me përgjegjshmërinë më të lartë këtë ngjarje kriminale”, shkruan Begaj.
Ende nuk ka ndonjë pistë se kush apo pse ka qëlluar drejt televizionit privat më të madh në vend, të cilit, si për ironi fati, i kanë ndërruar jetë të dy pronarët që e ngritën këtu e 22 vjet më parë, Vajdin Lame dhe Dritan Hoxha. /tesheshi.com/
