Bashkimi Europian ka futur Iranin si një negociator rajonal në zgjidhjen e krizës së Sirisë. Ndërkombëtarët parashikojnë që presidenti aktual të qëndrojë deri në zhvillimin e zgjedhjeve të lira presidenciale.
Kreu i Parlamentit Europian, Martin Schulz, ka zhvilluar një vizitë në Teheran ku ka takuar krerët e këtij vendi dhe nga këtu ka lëshuar mesazhin se Asad nuk do të qëndrojë gjatë në krye të Sirisë.
Schulz, pas takimit me kreun e Parlamentit iranian, Ali Larixhani, tha se Asad nuk ka të ardhme në postin e presidentit, ndërsa vijoi duke thënë se kriza siriane mund të zgjidhet përmes projektit të dialogut nacional.
“Duhet përgjigjur ndaj të gjitha temave që kanë të bëjnë me krimet e luftës”, tha Schluz.
Më pas ai u shpreh se çdo popull ka të drejtë të vendosë për të ardhmen e vet dhe shtoi se nevojitet që në Siri të zbatohen zgjedhje të lira me qëllim që populli të tregojë se çfarë dëshiron në të ardhmen.
Vizita e Schulz përfundojë pas takimit me presidentin Hasan Ruhani dhe me Ministrin e Punëve të Jashtme, Jevad Zarif. /tesheshi.com/
