Ministri i FSK-së Haki Demolli në një takim me zyrtarë të lartë të ministrisë që drejton, trajtoi edhe rastin e keqpërdorimit të uniformës solemne të FSK-së në një ceremoni private, në dasmën e një qytetari.
Sipas njoftimit që ministria shpërndau për mediat, reagimi i saj për problemin në fjalë nuk është bërë më herët për shkak se bëhej fjalë për reagime të ndryshme dhe njoftime të paverifikuara në media. Por, nga të dhënat e mbledhura rezulton se nuk ka pasur urdhër nga ministria për huazimin e uniformës së FSK-së për qytetarët privatë.
Në rastin konkret, të publikuar nga mediat, personi në rolin e shoferit në dasëm nuk është pjesëtar i FSK-së, por është vërtetuar se një pjesëtar i trupës frymore të FSK-së i ka huazuar uniformën solemne kryefamiljarit të dasmës, pa dijeninë dhe pa lejen e eprorëve të FSK-së. Ai është pezulluar nga trupa frymore.
Ky pjesëtar i FSK-së, i cili nuk është ushtar profesionist, ka shkelur rregulloret dhe ligjet e FSK-së si dhe ka dëmtuar rëndë imazhin e FSK-së para qytetarëve të vendit dhe opinionit publik.
Për këtë arsye, do të nisë procedimi penal edhe ndaj personit që ka veshur uniformën e FSK-së në mënyrë të paautorizuar, veprim ky që sipas Kodit Penal të Kosovës, paraqet vepër penale, për të cilën parashihet, ndër të tjera edhe dënimi me burg deri në një vit. /tesheshi.com/
