Petrit Selimi për Danas: Si do ta mundim Beogradin për UNESCO-n

Ndërkohë që ministri i Jashtëm serb, Iviça Daçiç, po luan të gjithë gurët për të ndaluar pranimin e Kosovës në UNECO, gazeta serioze serbe “Danas” ka intervistuar zv.ministrin e Jashtëm të Kosovës, Petrit Selimi, që të shpalosë platformën e Prishtinës që të rrëzojë murin serb.

Zëvendës-shefi i diplomacisë kosovare tha për mediumin beogradas së në Bordin Ekzekutiv të UNESCO-s po zhvillohen një sërë betejash të ashpra. “Ne po veprojmë me një qasje tejet pozitive, po flasim për shkencë, kulturë, arsim dhe domosdoshmërinë që Kosova të mos mbetet e izoluar. Jemi mirënjohës që një numër rekord i shteteve e kanë përkrahur futjen e kërkesës sonë si pikë të agjendë,” deklaroi Selimi, duke shtuar se “s’mund të fsheh faktin që jam i shokuar me strategjinë e Serbisë.

Ajo bazohet në një qasje tejet negative dhe gënjeshtra të kulluara. Qeveria e Serbisë po shpreson se nëse i përsërit shumë herë deklaratat e paqena, ndoshta një numër i mjaftueshëm shtetesh do t’u besojnë atyre”.

Ai tha se Qeveria e Serbisë po i kapërcen të gjithë kufijtë e protokollit diplomatik, duke rikujtuar deklaratat famëkeqija të ambasadorit serb në UNESCO, Darko Tanaskoviç, Ministrit të Jashtëm serb, Ivica Daçiç, dhe së fundi vet kryeministrit Vuçiç, të cilët i vënë Kosovës epitete prej më të ndyrave, madje duke e quajtur si “terrorriste”, ndërsa ambasadorëve u është urdhëruar që të mos ndalojnë së quajturi Kosovën “ISIS”.

Selimi theksoi se, në javët në vazhdim, Kosova do të nënshkruajë traktatin e parë në procesin e anëtarësimit në Bashkimin Evropian. Ai tha se qasja e Kosovës nuk është që të godasë fqinjët e saj, por se synon që të konsolidojë pozitën e saj në arenën ndërkombëtare.

Sa i përket trashëgimisë fetare dhe objekteve fetare në Kosovë në përgjithësi, Selimi tha se asnjë objekt fetar, përfshirë kishat, nuk do kërcënohet nga vandalët. “Ato janë plot me turistë dhe janë pjesë e sistemit tonë kushtetues. Është gënjeshtër e radhës që anëtarësimi i Kosovës në UNESCO do të dëmtojë kishën. Sekretari i Përgjithshëm i Kombeve të Bashkuara Ban Ki-moon ka përpiluar tre raporte ku përgëzon Kosovën për dialogun ndërfetar. Ne jemi pjesëtarë aktivë të koalicionit global  për luftimin e ekstremizmit të dhunshëm,” tha Selimi dhe shtoi se Kisha Ortodokse Serbe është e sigurt në Kosovë dhe do të jetë edhe më  e sigurt kur Kosova bëhet anëtare e UNESCO-s./tesheshi.com/