“Peshqit e mëdhenj”/ Ja çfarë u mësoi kryeprokurori kroat kolegëve shqiptarë

Dinko Cvitan, kryeprokurori kroat që është sjellë nga BE të japë përvojën kroate në kapjen e peshqve të mëdhenj të korrupsionit, u ka bërë një mësim didaktik perfekt prokurorëve shqiptarë të krimeve të rënda dhe task forcës antikorrupsion.

Për dy orë,  Cvitan jo thjesht ka dhënë përvojën po u ka mësuar “hilet proceduriale” se ku fle “lepuri i madh”. Burime të tesheshi.com bëjnë të ditur se kryeprokurori kroat u ka thënë se nuk vlen thejsht aksioma ndiq paranë, por e rëndësishme është ndjekja e njeriut që fsheh paranë. Ai ka qenë shumë familjar me realitetin shqiptar sa ka përdorur një proverb mitik: “te ferra e vogël fshihet lepuri i madh”.  Thelbi i trajnimit është mbështetur në një përvojë ballkanike ku paratë e korrupsionit nuk ndodhen të investuara në pallate apo pasuri të patundshme pasi ato mund të merren lehtë, por në aksione biznesi, të cilat nuk gjenden kurrë. Duhet të kapen bashkëpunëtorët që fshehin qarkullimin dhe fitimin e të korruptuarve.

Kryeprokurori kroat u ka bërë të ditur se në vendin e tij nuk ka qenë ish-kryeministri Ivo Sanader i vetmi i arrestuar por rreth 200 zyrtarë që kanë qenë të lidhur me zinxhirin e tenderave dhe rryshfetit. Por për tu kapur kjo “çetë” është dashur të rekrutohet një “batalion” bashkëpunëtorësh, të cilët do tu garantohet privatësia që ata të tregojnë gjithçka. Cvitan u ka dhënë edhe disa materiale konfidenciale por edhe guidë teknologjike që duhet të përdoren tashmë nga grupi shqiptar i atij që quhet operacioni më i madh antikorrupsion në Ballkan. Por a do të ndodhë vallë?! (tesheshi.com)