Ndërsa kriza ekonomike ndjehet ngado, Turqia nuk ka të ndalur në ritmin e saj të zhvillimit. Sot nisën fluturimet në aeroportin e parë mbi ujë në Europë, e të tretin në botë, të ndërtuar në një ishull artificial. Ai gjendet mes provincave Ordu dhe Giresun, e kështu ka marrë dhe emrin, aeroporti Ordu-Giresun.
Ndërtimi i këtij aeroporti nisi në vitin 2011, dhe u mendua i tillë ngaqë mes dy provincave nuk kishte asnjë vend të përshtatshëm për uljen dhe ngritjen e avionëve, për shkak të terrenit të thyer malor përgjatë bregut.
Ideja për një aeroport të këtillë është e hershme, që në vitin 1992. Punimet patën nisur dy vite më vonë, por u lanë në mes më pas për shkak të kostos së lartë.
Për mbushjen e 1.8 milionë metrave katrorë në det u deshën 35 milionë ton gurë. Ndërtimi i aeroportit kushtoi 360 milionë lira turke, apo ndryshe, 132.6 milionë dollarë. Zona ku është ndërtuar aeroporti është e njohur për shirat e rrëmbyer dhe stuhitë, e kësisoj teknologjia dhe materiali i përdorur ka qenë tërësisht i veçantë. Pista e aeroportit është 3.000 metra e gjatë dhe 45 metra e gjerë.
Aeroporti Ordu-Giresun do të presë e përcjellë 2 milionë pasagjerë në vit, dhe shpresohet të nxisë numrin e vizitorëve dhe të investuesve në rajonin e Detit të Zi.
Fluturimi i parë u krye sot, teksa një avion i kompanisë Turkish Airlines, me 136 pasagjerë, preku në mëngjes pistën e aeroportit të ri.
Një aeroport i tillë pritet të ndërtohet dhe në Rize, një tjetër provincë e njohur në veri të Turqisë.
Në ceremoninë e përurimit morën pjesë dy zyrtarët më të lartë të shtetit turk, presidenti Erdogan dhe kryeministri Davutoglu. Ky i fundit e inspektoi nga ajri aeroportin, i gjendur në kabinën e pilotëve të avionit me të cilin po udhëtonte.
Erdogani bëri të ditur se aeroporti që pritet të inaugurohet në vijim është ai në Hakkari, një provincë në juglindje të Turqisë, dhe shtoi se numri i aeroporteve do të arrijë shpejt në 60.
Turqia po ndërton njëkohësisht aeroportin e tretë të Stambollit, i cili do të jetë më i madhi në botë, me gjashtë pista të mëvetësishme fluturimi, e me një vend parkimi gjigand për avionët. 26 aeroporte kishte Turqia kur AKP-ja, Partia për Drejtësi dhe Zhvillim, e mori pushtetin në fillim të viteve 2000, e tani numri i tyre ka shkuar në 54. Mes veprave madhore në ndërtim mund të përmendim urën e tretë të varur në Stamboll. Gjithashtu vendin e trenave tradicionalë po e zënë trenat e shpejtësisë së lartë, ndërsa qeveria synon të shtrojë 3.500 km rrugë hekurudhore për to. /tesheshi.com/
