Partia Demokratike dorëzoi në Prokurorinë e Përgjithshme një kallëzimin penal ndaj minisrit të Shëndetësisë, Ilir Beqaj, pas denoncimeve se është i përfshirë në një aferë korruptive të Check-UP. Sipas opozitës, janë konstatuar një sërë shkeljesh, si favorizimi i mikeshës së kryeministrit, Vilma Nushi, si dhe shkaktimi i një dëmi financiar në buxhetin e shëndetësisë.
Kallëzimi penal u dorëzua në organin e akuzës nga deputetet Arbiola Halimi dhe Albana Vokshi. Kjo e fundit tha për mediat se ministri Beqaj ka abuzuar me paratë që duhet të shkonin në shërbim të shqiptarëve.
“Ky kallzim lidhet me një sërë shkeljesh, të proçedurave, të ligjeve, që përbëjnë edhe vepër penale, në këndvështrimin tonë, nga ana e ministrit, në lidhje me konçensionin e check-up. Eshtë një konçension i Check-up- it, i kontrollit të detyrueshëm nga mosha 40 deri në 65 vjeç, që u zgjerua vetëm para disa javësh, nga 35 deri në 70 vjeç, të cilin Partia Demokratike e ka denoncuar për shkak të abuzimeve të njëpasnjëshme dhe të klientelizmit, pra është një konçension që nuk ka marrë për bazë interesin e publikut, por përkundrazi, në kurriz të interesit të publikut ka favorizuar klientelën e Edi Ramës dhe Ilir Beqës. Vetëm me hartimin, përzgjedhjen e kritereve, përzgjedhjen e konçensionarit fitues, dhe me publikimin e tij, ne e gjykojmë që i është bërë dëm buxhetit të shtetit, mbi 16 milionë euro, pa përmendur këtu nisjen e implemetimit, ku në gjykimin tonë, vetëm në një 9-mujor, të vitit 2015, shifra të cilat ne i kemi bërë publike vetëm para disa ditësh, është një abuzim prej 1.5 milionë eurosh”, tha Vokshi.
Gjatë javës që kaloi, PD ka nisur proçedurat edhe për një tjetër padi ndaj ministrit Beqaj, pas skandalit që u publikua në media, ku ai dëgjohet në një audio-regjstrim, duke shkarkuar një mjek në Tropojë, se nuk mori pjesë në një mbledhje të strukturave partiake./tesheshi.com
