Kreu i komenduar i PD-së, kahja Basha, Enkelejd Alibeaj, prezantoi lazaratasin Roland Bejkon si kandidat për kryetar të bashkisë Tiranë.
Bejko, ish-kreu i demokratëve të Gjirokastrës, njëherësh dhjetorist, u shpreh se në vijim do t’u prezantojë qytetarëve të Tiranës projektin e tij për kryeqytetin ndërsa shtoi se propozimit e grupimit në të cilin ai bën pjesë do të jenë të bazuara “mbi mundësitë reale që ekzistojnë për të ndryshuar Tiranën.”
Por më shumë se kaq, ai iu qas politikisht garës.
“Unë nuk mund të pranoj që e djathta shqiptare të përfaqësohet nga lëvizje politike të cilat janë në izolim total ndërkombëtar. Ky do të ishte një turp dhe fatkeqësi për të ardhmen e Partisë Demokratike dhe të djathtës në Shqipëri. Vokacioni i saj, arsyeja se përse kjo forcë lindi ishin pikërisht vlerat perëndimore dhe alenca historike me Shtetet e Bashkuara të Amerikës. Vlera të cilat, njerëz dhe politikanë të caktuar për interesat e tyre personale kërkojnë t’i shkelin, duke e kthyer të djathtën shqiptare në një fole anti-perëndimore në Shqipëri”, arsyetoi Bejko, duke patur në mendje Berishën,
“U bëj thirrje të gjithë demokratëve të Tiranës, të gjithë atyre që kanë kontribuar që kjo forcë politike të rritet dhe të përfaqësoj vlerat më të mira perëndimore të bëhemi bashkë në këtë rrugëtim të vështirë por që ja vlen për të ardhmen e Tiranës dhe Shqipërisë”, tha ai. /tesheshi.com/
