Gjatë fjalimit me rastin e samitit të Amerikave, takim që do të shënojë afrimin mes Uashingtonit dhe Havanës, Presidenti amerikan, Barack Obama konfirmoi se afrimi mes SHBA-së dhe Kubës shënonte një kthesë në hapësirën amerikane.
”Politika e re amerikane kundrejt Kubës shënon një kthesë për të gjithë rajonin”, deklaroi Obama duke shtuar se fakti që presidenti Raul Castro dhe unë jemi ulur këtu sot përbën një ngjarje historike.
Përballja e shumëpritur e ditës së sotme do të shënojë një kthesë në afrimin e njoftuar pas 18 muajve përpjekjesh të kryera në fshehtësi të plotë, që kanë mundësuar kthimin e faqes të një gjysmëshekulli konflikt.
Në agjendën e diskutimeve të tyre do të bëjë pjesë sigurisht rivendosja e marrëdhënieve të tyre diplomatike, që po vonojnë të konkretizohen pavarësisht tre raundeve diskutimesh të nivelit të lartë në Havanë dhe Uashington.
Pengesa kryesore për rihapjen e ambasadave për momentin ka të bëjë me faktin e pranisë së Kubës në listën amerikane të shteteve që mbështesin terrorizmin, që e privon Kubën nga një pjesë e ndihmës ndërkombëtare.
Shtëpia e Bardhë theksoi se Obama nuk ishte akoma në fazën për të marrë një vendim lidhur me këtë çështje, por gjithashtu nuk përjashtoi një njoftim në Panama.
“Çështja e embargos amerikane kundër Kubës duhet të zgjidhet” tha Presidenti kubanez, Raul Castro gjatë një fjalimi në samitin në Panama, duke shtuar se zgjidhja e çështjes së embargos së vendosur që prej vitit 1962 do të ishte një hap pozitiv.
Presidenti kubanez, Raul Castro e cilësoi gjithashtu presidentin amerikan, Barack Obama si njeri të ndershëm gjatë samitit historik të Amerikave para se të përqendrohen në afrimin mes dy vendeve pas më shumë se një gjysmë shekulli konflikt.
“Presidenti Obama është një njeri i ndershëm”, theksoi Castro gjatë samitit në Panama pak para një takimi të parashikuar mes dy krerëve, i pari mes presidentëve të dy vendeve që prej vitit 1956.
