Kryeministri Edi Rama ka ndërmarrë një betejë kundër paaftësisë, korrupsionit dhe problemeve të tjera që dallojnë administratën shtetërore.
Deri më tani ai ka ecur me teorinë e kërbaçit, duke nxjerrë emra me drejtorë të denoncuar, duke kërkuar në mënyrë publike dorëheqjen e gjithë drejtorëve të hipotekës, apo duke hedhur akuza për “tepsinë” e partisë, etj.
Por sot ai ka kthyer pllakën dhe ka ofruar “karrotën” duke lavdëruar 50 punonjësit më të mirë të kësaj administrate dhe duke deklaruar se ata që punojnë janë shtylla kurrizore e saj.
Por ai u ka kërkuar atyre që të bëhen vlerësuesit e shefave politikë të tyre.
Në takim me 50 punonjësit teknikë më të mirë në Shqipëri sipas konkurseve të Departamentit të Administratës Publike Rama u kërkoi që deri në 10 gusht ata të kenë përgatitur një raport me detaje të hollësishem të marrëdhënieve të tyre me drejtuesit politik dhe me punën që bëjnë.
Kryeministri Edi Rama u ka kërkuar punonjësve të administratës që të dërgojnë në mënyrë konfidenciale raporte për punën e tyre dhe institucionit ku ata punojnë. Kryeministri thotë se kjo do të shërbejë për të përmirësuar administratën në 4 vitet e ardhshme, për të cilën Rama tha se është prioritet strategjik i qeverisë. Synimi i këtyre “raporteve” do të jetë goditja e elementëve parazitarë nëpër institucione.
Raportet që do të dorëzohen më pas do të shërbejnë për drejtuesit e rinj që do të emërohen me qeverinë e re.
Ai tha se duhet të mbyllen hendeqet midis drejtuesve politikë dhe punonjësve civilë të administratës./tesheshi.com/
