Ministri i Bujqësisë, Edmond Panariti ka shprehur domodoshmërinë për statistika të besueshme në sektorin e bujqësisë, si mënyra e vetme për të tërhequr vëmendjen e investitorëve të huaj. Këto deklarata, Panariti i bëri gjatë pjesëmarrjes së tij në prezantimin e platformës “Sistemi i Informacionit dhe Inteligjencës për Bujqësinë” (AGIS). Ministria tha se kjo platformë do të shërbejë edhe si një pikë referimi për institucione bankare, në mbështetje të sektorit bujqësor.
I pranishëm në këtë aktivitet ishte edhe ambasadori i Zvicrës, Christoph Graf, i cili shprehu domosdoshmërinë e financimit të SME-ve dhe të sektorit bujqësor përmes platformave inovative si AGIS, e cila ofron informacion të plotë mbi bujqësinë, përfshirë të dhëna të detajuara mbi prodhimin, tregtimin dhe financat, me synim rritjen e kredidhënies për SME-të shqiptare.
“Një inisiativë të mirë” e quajti ministri Sistemin e Informacionit dhe Inteligjencës për Bujqësinë, AGIS dhe sipas tij, “shpesh të dhënat janë kontradiktore. AGIS do të shënbejë për një bursë potenciale e produkteve agrare dhe duke vepruar si një sistem dinamik të dhënash, shumë shpejt do të kthehet në një element qëndror për këtë sektor”.
Ky event u organizua nga Ambasada e Zvicrës dhe projekti i saj “RisiAlbanianë”, në partneritet me Creative Business Solutions (CBS).
AGIS është një platformë elektronike profesionale dhe burim gjithëpërfshirës të dhënash mbi Bujqësinë në Shqipëri, zhvilluar në funksion të profesionistëve bankarë, konsulentëve të biznesit, ekspertëve të bujqësisë, studiuesve dhe agrobizneseve. Kjo platformë përfshinë informacion të hollësishëm statistikor për mbi 75 produkte bujqësore dhe blegtorale. /tesheshi.com
