Lulzim Basha ka paditur në SPAK kryeparlamentaren Lindita Nikolla, duke e akuzuar atë për shpërdorim detyre.
Më saktë, Basha pretendon se znj. Nikolla ka lejuar në protokollin e Kuvendit të administrohen akte shkresore të lëshuara nga Gazmend Bardhi, sipas Bashës, pa tagrin e kreut të grupit parlamentar demokrat.
“Në kundërshtim me qëndrimin zyrtar të Partisë Demokratike, të bërë publik nga Kryetarja e Kuvendit, kjo e fundit dhe administrata e Kuvendit, në bashkëpunim me njëra tjetrën kanë lejuar që në protokollin e Kuvendit të administrohen akte shkresore të lëshuara nga një deputet që nuk gëzonte tagrat e Kryetarit të Grupit Parlamentar të Partisë Demokratike, që këto akte të shpërndahen në administratën e Kuvendit dhe që kjo e fundit nën urdhërimin e Kryetares së Kuvendit të kryente dhe zbatimin e kërkesave që prodhonin efekte ligjore tek të tretët (duke marrë si shembull këshilltarët e grupit parlamentar të cilëve ju ndërprenë marrëdhëniet e punës)”, thuhet ndër të tjera në padi.
Kështu, çarja e rëndë e PD-së në “dy copa”, ajo Basha e ajo Berisha, po vijon të prodhojë ngërçe të rënda politike e institucionale. /tesheshi.com/
