Vullnetarët europianë për të ndihmuar popullin palestinez po përgatiten që të dërgojnë një anije me ndihma humanitare në Gaza, duke marrë parasysh dhe periudhën e Muajit të Ramazanit.
Por organizatat humanitare i druhen një sulmi nga Izraeli dhe i bëjnë thirrje komunitetit ndërkombëtar për parandalimin e ndonjë sulmi dhe dëmtimi të mundshëm që Izraeli do t’i shkaktonte Flotiljes së 3-të të Lirisë, e cila do të niset për të dërguar ndihma dhe për të thyer bllokadën e Gazës.
Zyrtari i “Fushatës Evropiane për të thyer rrethimin e Gazës”, Rami Abdu dhe përfaqësuesi Fondacionit Humanitar për të Drejtat dhe Liritë e Njeriut (IHH) për Gazën, Mehmet Kaya mbajtën një konferencë për shtyp në lidhje me Flotiljen e 3-të të Lirisë, e cila do të niset nga Athina për të dërguar ndihma dhe për të thyer bllokadën e Gazës.
Abdu, në fjalimin e tij të mbajtur në Gaza tha se: “Po paralajmërojmë se Izraeli mund të ndërmarrë sulme ndaj Flotiljes së 3-të të Lirisë. Kushdo që dëmton pjesëmarrësit duhet ta dijë se ne do ta ndjekim çështjen në gjykatën ndërkombëtare”.
Ai ka kërkuar nga komuniteti ndërkombëtar që të ofrojë sigurinë e nevojshme ndaj aktivistëve të Flotiljes së 3-të të Lirisë dhe garanci se ata nuk do të sulmohen. Gjithashtu ai tha se në këtë flotë ndodhen aktivistë nga vende të ndryshme të Evropës, deputetë, politikanë, gazetarë dhe emra të njohur të botës arabe.
Abdu ka theksuar se flotilja përbëhet të paktën nga 5 anije dhe se pas përfundimit të procedurave të nevojshme në orët e ardhshme do të nisin udhëtimin drejt Gazës.
IHH nuk do të marrë pjesë në Flotiljen e 3-të të Lirisë -anija “Mavi Marmara”.
Ndërsa përfaqësuesi i fondacionit IHH për Gazën, Mehmet Kaya ka pohuar se: “Kemi marrë pjesë në vitet e shkuara në Flotiljen e Lirisë. Këtë herë njoftojmë se nuk do të marrim pjesë”.
Kaya ka shprehur më tej se: “Sa herë që kemi marrë pjesë Izraeli na ka akuzuar si ‘organizatë terroriste’. Këtë herë për t’i provuar Izraelit se nuk jemi vetëm dhe se 37 vende mbështesin Gazën, duke ia lënë këtë çështje aktivistëve ndërkombëtarë vendosëm të mos marrim pjesë në këtë flotë”.
Në lajmin e radios izraelite të bazuar në burime ushtarake theksohet se forcat e sigurisë izraelite kanë dhënë udhëzime për autoritetet përkatëse për të parandaluar hyrjen e Flotiljes së 3-të të lirisë në Gaza.
Në lidhje me këtë çështje nga Izraeli nuk është bërë ende ndonjë njoftim zyrtar. Si pasojë e sulmit të ushtarëve izraelitë ndaj anijeve të ndihmave që kishin shkuar në Gaza më 31 maj 2010 në anijen “Mavi Marmara” humbën jetën 9 persona aktivistë. /tesheshi.com/
