Kryetarja e Komisionit Europian, gjermania Ursula von der Leyen, tha se BE është gati të japë 600 milion euro për rajonin.
Në një konferencë për shtyp me kryeministrin Rama, ajo tha se gjithçka varet nga projektet e paraqitura.
“Ju jeni ata që bëni propozime për projekte në mënyrë që ne të arrijmë dhe të sjellim më shumë investime. Tanimë kemi investuar 500 mln euro, e kam kënaqësinë të them se do të investojmë edhe 600 mln të tjera.
Po bashkëpunojmë me njëri-tjetrin për të krijuar vende pune dhe për të lidhur rajonin”, tha presidentja e KE-së.
Ndërsa sa i përket “Open Balkan”, ajo tha se është një inisiativë e mirëpritur.
“Mendoj se po të shikojmë ecurinë ekonomike si dhe thellimin e marrëdhënieve ekonomike mendoj se Procesi i Berlinit është kuadri që ne po përdorim, që të 6 vendet e Rajonit, nga të cilat do të përfitojnë. Kjo është ajo që po shohim në rajon.
Çfarëdo inicitive që është brenda procesit të Berlinit mirëpritet prej nesh.
Ne duam një proces të hapur gjithë përfshirës që i shtyn të gjithë të jenë pjesëmarrës dhe thellon eshë marrëdhëniet ekonomike të vendeve të Rajonit”, argumentoi diplomatja e lartë e Brukselit, e cila me Tiranën nis një tur në rajon.
Qëndrimi i saj qe nxitës për Ramën, i cili tha:
“Ky nuk është një proces i dytë që konkurron me të parin, apo që aq më pak bien ndesh me të parin. ‘Ballkani i Hapur’ mund të quhet ‘i zoti i nxjerr gomarin nga balta’.
Procesi i Berlinit është iniciuar nga Merkel dhe përqafuar nga BE dhe KE, por nuk ecën dot me ritmi që ne duam. Procesin e Berlinin e udhëheqin miqtë dhe partnerët tanë që kanë njëmijë halle të tera dhe nuk çohen me mendjen si eci Procesi i Berlinit sot në Ballkan.
Për këtë arsye na duhet që të marrim përsipër ta shtyjmë këtë projekt përpara dhe të heqim muret e barrierave tarifore. pasi nuk vjen qeveria gjermane apo franceze të shohë se si do trajtohen perimet apo frutat në kufijtë e Ballkanit”, tha Rama. /tesheshi.com/
